Silanus 1991

Sassari 1983

Sassari 1983 1

 

 

 

 

 

 

 

 

 

 

 

Custu est s’esórdiu de una gara de poesia in Samugheo, 25 annos innanti de oe, cun Peppe Sozu, Frantziscu Sale e Marieddu Màsala in palcu pro Basile, santu pìscamu de Cesarea. Su 31 de Austu, dae deghinas de annos, marcat un’abboju cun sos poetas de su Logudoro. Dae su comintzu de su séculu coladu s’onore a su Santu si rendet a primu cun sos cantadores. In custa gara, Peppe Sozu aiat brincadu de un’iscalina sos 70 annos, Frantziscu Sale nde teniat 53 e Marieddu Màsala nd’aiat cumpridu 50 sa die 23 de su matessi mese.  

 

 

1. Sozu (1’22”)

Cando a primu m’as bidu in logos tuos

trintanoe annos passados che sunu.

Deo tando nd’aia trintaduos

e Piras e Piredda barantunu,

Nìnniri fit su mannu ’e su radunu,

chimbantasese fin sos annos suos.

Oe so deo ’e sas garas decanu

e bos nde ’ato un’istrinta ’e manu.

 

 

2. Sale (1’17”)

Si ch’est passada un’annada intrea

chi mi fia da ’ois dispedidu:

cun-d-una die bella e una fea,

goi o gai su tempus chi est paltidu.

Como m’asa de nou preferidu

po sa festa ’e su santu ’e Cesarea:

onoradu ’e bos èssere in preséntzia

bos saludo cun tanta riveréntzia.

 

 

3. Màsala (1’00”)

Po sa festa ’e Basile Cesareu

m’invitas che poeta a Samugheo.

Coment’as fatu, mi domando deo,

a t’ammentare su nùmene meu?

Intantu a custa gara parte leo

ringratziende a tie umpare a Deu

e poi ’e tantu in custa note ’e luna

rétzinde istrinta ’e manu un’ateruna.

 

 

4. Sozu (1’12”)

Est sa segunda ’orta in logos tuos

chi in s’otantachimbe ponzo pêse.

Da chi in trìulas fio in su mese

una gara cumpridu amos in duos

comente si acòpian sos giuos

e-i sa gara faghimos in trese.

E bi at aer pius importàntzia

gai naramos: vivat s’abbundàntzia.

 

 

5. Sale (1’14”)

Peppe fit nende chi at canos sos chizos

e chi est su pius mannu, a veridade,

puite sende ’e diferente edade

parimos unu babbu e duos fizos.

Ma mirende sa giusta realtade

est puru in gradu ’e nos dare cossizos:

dêt parrer fin’a bois meraviglia

ca parimos de tot’una famiglia.

 

 

6. Màsala (59”)

Ma in subra ’e ogni palcu poesianu

ancora so in vigore e in voghe

ca est raru su paese isolanu

ch’in palcu intesu non m’apat sa ’oghe

ma sas garas chi ch’apo fatu inoghe

si contan in sos didos de una manu

si comente no ch’’enzo frecuente

ma coment’apo promissu so presente.

 

 

7. Sozu (1’13”

Cantadu tzeltu ja no ch’as che deo

ca in piusu sos annos bi sunu

ma ormai s’incómudu nde leo,

m’an a escluder dae su radunu

e tue puru penso in Samugheo

chi ocupas su postu ’e calicunu.

E-i sas festas ti podes godire

cando ch’as cantare in s’avenire.

 

 

8. Sale (1’15”)

Màsala, no bi ponzas gautella

sempr’as tentu in sos palcos bratzu duru.

S’istanote faghimos gara bella

non b’at de disperare, ista siguru:

inoghe in Samugheo a su futuru

bi as a tenner pius crientella

As a ricuperare de su passadu

su tempus chi no ti ch’an invitadu.

 

 

9. Màsala (47”)

O Sotgiu, pro s’edade ti rispeto

comente l’apo tentu sempre a usu.

Como s’invitu ’e Samugheo atzeto,

acómi ’e custu palcu torra susu

però a morrer tue non iseto

pro chi deo chi ’enza de piusu.

M’augùro chi vida longa tenzas

e cantu che ses bénnidu chi ch’enzas.

 

 

10. Sozu (1’07”)

Ma s’at sa conca cambiadu intinnu

como s’est ruinzende dogni petzu

deo a inoghe a ch’’enner fio avetzu

ch’ap’intonadu pius de un’innu

ma in sos palcos so su pius betzu

e tue sese su pius pitzinnu.

Da chi eo ch’iscùtino ogni foza

an a leare a tie a bona ’oza.

 

 

11. Sale (1’10”)

Peppe si est andende a pesa-rue

est betzu e l’est manchende s’energia.

Mario, ses ancora in pitzinnia,

pigare ja chi podes a sa nue:

s’acordu nos ponimos deo e tue

li damos istanote bataria.

Faghimos bier gai a dogn’istranzu

chi Peppe Sotgiu leat unu ’anzu.

 

 

12. Màsala (47”)

Non ti naro chi, Sotgiu, non ses bonu

mancari chi ti pares lenu-lenu.

Poi de milli trassas ses pienu

però non nd’ap’a leare assuconu

ca mancu tue inoghe ses padronu

ca ses in-d-unu palcu in logu anzenu

pro ch’as sos pilos biancos che nie

ma ses un’invitadu che a mie.

 

 

13. Sozu (1’07”)

Non bos proedas in duos potentes

si unu podet bastare a sa sola.

Oramai sa trassa e-i s’iscola

non mi sun ne amigas ne parentes:

como chi ch’apo példidu sas dentes

no b’at mancu bisonzu ’e musarola.

Bos podides leare ogni divagu

ca sentza dentes ja móssigo pagu.

 

 

14. Sale (1’11”)

Ses isdentadu ma ja tenes pesu

po la sustenner sa tua barraca.

Pónemi mente, Mario, e ataca

chi Peppe Sotgiu paret mesu ofesu:

si cheres ja mi ch’’esso dae mesu

e gai tue ti setzis afaca

chenza mancu l’iscuder ne lu ofèndere

gai mezus ti ’enit a difèndere.

 

 

15. Màsala (56”)

Ma inoghe est Basile chi si festat

su ch’at s’aneddu e bastone in farranca.

S’a sa dresta bi at un’alva bianca

no chelzo ’e pompa vana chi si ’estat:

bistet siguru chi a s’ala manca

sa palte sena fata ja non restat.

E si b’at unu ch’istat mesu male

a mie paret ch’est Frantziscu Sale.

 

 

16. Sozu (1’05”)

A fagher garas de ótima marca

chi non restet su pópulu delusu.

Ormai s’’e sos palcos nde so susu,

non chelzo a mi contare unu monarca

ca si setantun annu apo e piusu

devo tirare sos remos in barca

prite s’edade mia est ja passada

e como devo bater retirada.

 

 

17. Sale (1’08”)

Non paret gai sa sorte niedda

ma forsis Mario at male cumpresu.

Deo so a su centru in sa camedda

e pius pagu mi calat su pesu:

ammenta, finamenta in sa padedda

chi su sale si ch’’etat sempre in mesu.

E fintzas cando paret chi non balit

si ch’est betadu in mesu sempre salit.

 

 

18. Màsala (46”)

A mie in su batizu m’an salidu

cando pigadu mi ch’an a s’altare.

Però inoghe a fiancu ’e pare

a mie e a Sotgiu ti an unidu

e t’at a andare male a ti colcare,

deves bistare tota note ischidu.

In mesu nostru non podes drommire

e t’andat finas male a ti fuire.

 

 

19. Sozu (1’00”)

S’est sa gara sa ’ostra facultade

sezis in su pienu de sa luna

e si bos acumpagnat sa fortuna

su donu chi tenides isfrutade.

Eo oramai so a un’edade,

non poto tenner pretesa peruna:

pro amicìtzia sa zente mi ’atit

e ringràtzio a chie mi cumpatit.

 

 

20. Sale (1’06”)

Mario, bene atentzione presta:

po mi fuire non la movo s’anca

ca deo jogo sas caltas in banca

cantende in sa piatzas de sa festa

e po chi siat Sotgiu a s’ala dresta

tue sias invece a s’ala manca

sa piena isperàntzia la tenzo

chi custu postu meu lu mantenzo.

 

 

21. Màsala (47”)

Sotgiu, mi paret ch’est s’ora propìtzia

narrer ch’inoghe as fatu sucessu

e sa fama andada est in progressu,

in Samugheo ch’at dogni delìtzia.

Issos ti jaman ca b’at amicìtzia

ma tue ’eninde ses pro s’interessu

e sas oras chi ch’istas ti recreas

e batis pagu e meda ti che leas.

 

 

22. Sozu (1’07”)

Mario, a ti narrer chi as faddidu

ti deves abbizare; as fatu dannu.

Ja non nde so orgogliosu e ne mannu

e mai apo sa crìtica timidu

però si paga cosa aio ’atidu

non mi ch’aian invitadu ogn’annu.

E ses disonorende a Samugheo

si ’ato pagu e meda mi che leo.

 

 

23. Sale (1’08”)

Mario, lassa sa crìtica amara:

non la penso che tue ’e parte mia.

Si sa presentza ’e Sotgiu tenen cara

ca a custa zente at fatu simpatia

ca cando pigat a subra sa gara

est in gradu ’e ti dare poesia.

Como a mi cumpiagher bi resessi:

nois fetemus gai su matessi.

 

 

24. Màsala (46”)

In Samugheo ch’at zente signora,

Peppe Sozu, e a tie non ti ofendo.

Po gai calchi cosa b’at ancora

chi non t’apo cumpresu e ne cumprendo

ca sa die chi débbile m’intendo

dae domo non bogo murru a fora.

Proite tue a dogni abbelta ’e laras

como chi ses in debbilesa naras?

 

 

25. Sozu (49”)

Ma.s’edade mi rendet impotente,

sas istajones mias sun passadas.

Ma su ch’as nadu insara tene in mente

da chi sas frases sun esageradas

ca guasi asa nadu a custa zente

chi a mie mi ’atin indebbadas

e mi dana una glória famosa

da chi deo lis bato paga cosa.

 

 

26. Sale (1’06”)

Ma miréndelu deo a sa figura

non paret tantu Peppe in debbilesa:

ancora ja mi paret a s’altesa

de poderare in palcu ogni istrutura

e mancari lu siat in betzesa

a sos pitzinnos nos faghet paura

prite che cuddu diciu faghet proa

chi narat: caddu ’etzu, fune noa.

 

 

27. Màsala (44”)

Sas frases mias sunu mesuradas,

o gentile collega bonorvesu.

Mi dispiaghet si ti ses ofesu

ca tand’as sas orijas tuponadas

proite dae me non l’as intesu

ch’a Samugheo t’’atin indebbadas

ca si faghen su contu ’e sas ispesas

ti pagan totu chilos cantu pesas.

 

 

28. Sozu (58”)

Deo a su malu li naro pucidda,

non poto cambiare dae inie

ca si late m’an sutu calchi die

signu ch’at resu sa mia mamidda:

ammenta chi no as ofesu a mie,

chi as ofesu custa intera ’idda.

A da ch’invitan sos chi pagu renden

est signu chi inoghe non cumprenden.

 

 

29. Sale (1’15”)

Si pones mente a Peppe Sotgiu lassas

e cambias sa tua opinione.

S’esaminas sa sua espressione

ancora nde pronunciat frases rassas

ca cussu est comente su matzone

chi cambiat su pilu e non sas trassas.

E si chi est beninde dae ora

est ca sas trassas las giughet ancora.

 

 

30. Màsala (45”)

Candu ti fichis téteru che palu,

Sotgiu, ja no s’est fatu a un’unchinu

e si non sun sas fortzas in declinu

mancu sa fama at a esser in falu.

A Samugheo ch’’enis de continu,

deo non t’apo nadu chi ses malu:

apo gentiles sas espressiones

ma sun tuas imaginatziones.

 

 

31. Sozu (52”)

Mi’ sa frase inventada non l’ap’eo

po cherrer fagher crìtica maligna.

Una risposta a ti dare m’impreo

de su chi tue mi das in consigna

e de su chi nde pensat Samugheo

pensat sa bona parte de sa Sardigna.

E s’apretzan sas mias poesias,

Mario, imbidiosu non nde sias.

 

 

32. Sale (1’11”)

Po sos poetas sa solte niedda

paret ch’at postu sas caltas in bancu.

S’annu passadu fit moltu Piredda

e ocannu che nd’amos unu ’e mancu:

non ti penses chi siat cosighedda

a Peppe Sotgiu a tenner a fiancu.

Est de sa poesia su pilastru

nos lu tenzemus contu ca est su mastru.

 

 

33. Màsala (44”)

O Peppe Sotgiu, si sa tua cantas

ap’eo puru ’e cantare sa mia.

Ma cando t’insuperbis e ti ’antas

tando che ses bessinde dae via:

pensa chi Samugheo est un’ebbia,

sas biddas de Saldigna sunu tantas.

E de te non nde so imbidiosu

tantu no m’an collocadu a riposu.

 

 

34. Sozu (1’01”)

Un’esórdiu fatu ’e barzelletas

fino in allegria, festa e giogu.

Cantu poto ap’a dare disaogu

e tue puru sa parte ti fetas

ca tantu semus pagos sos poetas,

in sa Saldigna pro totu che at logu.

Gai musa cherimis e in vida

e cun custa la faghimos finida.

 

 

35. Sale (1’11”)

Gai est sa realtade neta e giara,

cumpresa l’epas cun-d-unu faeddu.

Po sos poetas sa solte est amara,

non bi nd’at diletante unu piseddu

ca sos in gradu de cantare in gara

ja no ispuntan che su cogumeddu.

Paret pitzinnu non bi nd’at mancunu,

tenimos contu custos chi che sunu.

 

 

36. Màsala (47”)

Finida custa parte firmu isto

e gai a s’ala mia mi nd’assento.

Sotgiu, cando cun tegus mi presento

finas deo prestigiu acuisto:

cando ses a sa dresta mi cuntento,

cando mi mancas invece mi atristo.

E ischimos: ses poeta e cantas bene

ma non timas chi nudda ti che lêne.