Non possu che nai e non ddu bogliu atacai ca soi deludiu meda e cun colu mannu de cussu chi est fendu Vladimir Putin, chi s’at pigau una responsabilidadi manna po su mundu” portendu sa Russia a una cosa mai bista in sa Storia, contras de s’Ucraina.

Aici Sirviu Berlusconi , de su parcu de s’atobiu de Fortza Italia in Roma, at chistionau de sa guerra in Ucraina. Fueddus chi in medas boliant ascurtai, finas poita cun su capu de su Cremlino teniant un’amistade de tempus meda. Berlusconi no at fatu perunu scontu: “Is bocidorgius de Bucha funt criminis de guerra, chi sa Russia non podit negai. Antzis iat depiri ponni suta processu is responsabilis”.

Cantu pertocat Putin at invecias nau: “Ddu apu connote bint’annus a imoi, e mi fut partu unu cun sa conca a postu, chistionaiat sempiri de democratzia e de pagi, lastima manna po cussu chi est sussediu”.

“Tocat a fairi – at sighi Berlusconi – totu cussu chi si podit po fairi acabai custa guerra e s’Italia depit trabagliai propriu po custu, poita si lompat a un’acordiu chi andit beni a totus. Custu bolit nai ca sa libbertadi e s’unidadi de s’Ucraina depit essiri a innantis de totu. Fortza Italia fut e at essiri sempiri unu partidu a favori de s’Europa e de sa Nato, po cussu sa spera nosta est chi Europa, Stadus Unidus e Russia si torrint a chistionai comenti sussediat unu tempus. Ma est s Russia chi depit fairi su primu passu, acabbendudedda de umperai bombas e missilis. Est sa prima cosa de fairi chi si bolit lompiri a sa pagi”.

Po Berlusconi cussa de eriseru est stetia sa prima bessida uficiali de tempus meda e in s’ocasioni at chistionau finas de politig italiana e de cussu chi depit fairi Fortza Italia.

“Cussu chi apu nau oi s’assimbigliat a cussu chi apu fatu in su 1994 candu soi intrau in politiga po cicai de rimai is comunistas chi boliant su poderi”.

 

 

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.ansa.it/sito/notizie/politica/2022/04/09/berlusconi-oggi-una-nuova-discesa-in-campo_2a1bc525-f0f3-49e2-8dcc-c4fb7b54237b.html