Un’àteru nùmene de importu in su campu de sas tradissiones populares vivet como in su mundu de sas ànimas bonas: Gianni Medda. Teniat 78 annos, sa salude sua aiat peoradu in sos ùltimos meses e Gianni no est reséssidu a la torrare in bonu.
Comente cumbinat cando si ch’andat una pessone distinta in campos de siendas non materiales, sa morte est unu passazu ebbia dae unu mundu a s’àteru ca s’ammentu restat in su coro de sa zente de oe e benit tramandadu a sos benidores puru.
A sa Missa de s’interru a borta de die, oe, lunis 17 de martu, in sa cheja de S’Ispìritu Santu in Su Planu, parentes, amigos e connoschentes amus a esser inie pro s’ùltima dispedida. In su nùmeru de abrile de Làcanas azis a agatare un’aparitzu cumpridu de sos meritos chi Gianni Medda at tentu in su campu de su folclore sardu.
Adiosu, amigu de chentu seranos a lughe de isteddos.
