Una sonada manna po Donal Trump e unu numuru mannu de votus, po is democraticus, chi aici meda mancu si ddus aspetaiant. Sa torrada eletorali de metadi presidentzia, in is Stadus Unidus, donant a s’opositzioni su cumandu in ambas is Cameras de su Congressu, oberendu unu tempus nou inturu de sa relata de sa Domu Arva cun su Parlamentu. Unu spantu mannu chi permitit a is democraticus de binciri in Stadus chi, de sempiri, funt cumandaus de is republicanus: bastat a donai una mirada a is arresurtaus de su Texas e de su Kansas. Imoi Trump, comenti si narat, est un’anadi tzopa e, po is dus annus benientis, tenit is manus acapiadas.

Is Democraticus ce dda faint a binciri in logus chi, feti dus annus a oi, iant sustenniu a Trump e ddu ant fatu cun numurus spantosus: sonumancu sesi is segius pigaus in su Senau e aici meda non funti mai stetius de su 2008. In su Texas sa vitoria si poderat su nomini de James Talarico, 37 annus et ex seminarista, chi at bintu contras de su procuradori generali republicanu Ken Paxton. Una bincita storica, poita ca is democraticus non ce dda faiant de su 1994 a binciri una torrada eletorali. Est finas de nai, po cumprendiri, ca in su 2024, is republicanus iant bintu cun catodixi puntus in prus.

In su South Carolina, sa dotora de is pipius Annie Andrews at bintu contras de Darline Graham, candidada republicana e sorri de su senadori Lindsey Graham, mortu in su mesi de orgiolas. Annie Andrews diventat aici sa prima femina chi lompit in su Senau federali. Vitorias finas in North Caroline, cun su guvernadori beciu Roy Cooper, in Ohio, aunia Sherrod Brown torrat a setziri in cadira, e in Kansas, cun su reverendu Adam Hamilton primu democraticu a binciri unu segiu de su 1932. In su Maine, Troy Jackson at bintu contras de sa republicana Susan Collins.

Invecias, po cussus Stadus chi funt a erriscu mannu est andada goi: Joe Ossof bincit ancora in Georgia, in su mentris chi in su New Hampshire Chris Pappas bincit su republicanu John Sununu. Sa Florida, cun Ashley Moody chi bincit contras de sa democratiga Angie Nixon, abarrat in manus de is republicanus.

 

 

 

Foto: https://www.wired.it/attualita/politica/2020/07/13/trump-rifiuto-lasciare-casa-bianca/