Su mundu s’apontat a arrespundiri a sa guerra de is datzius posta in peis de Donald Trump. Su paperi, lamau “reciprocal tariffs”, ddu ant fatu girai a is giornalistas in su Giardinu de is Orrosas de sa Domu Arba, de su cali su Presidenti de is Stadus Unidus at cumentzau sa chistioni.
In su paperi, de otu paginas, is tabellas chi amostant Natzioni po Natzioni is datzius po is amigus e is nemigus. In pagu fueddus: unu datziu de su 10%, de su cincu de arbili, at essi po totu is Natzionis (comenti su Regnu Unidu, s’Australia, su Brasile). Dapoi ant a lompiri is datzius “persolizaus”, de su noi de arbili, po is Natzionis “peus”, est a nai cussus chi ant postu datzius o tassas in pissu de sa produtzioni americana. Po s’Unioni Europea s’at a erribai a su 20%.
Po cantu pertocat is veturas strangias s’at a sighiri a poderai is datzius a su 25%, comenti giai s’est fendu de unu pagheddu de tempus. E finas cun dd’unu amelessu: “Abarrai in pagi ca nde chi nò eus a fairi ancora prus a malus”.
In su mentris chi falant is borsas asiaticas e is “future” de Wall Street, cun su pretziu de s’oru mai connotu aici artu, lompint is fueddus de Ursula von der Leyen: “Seus in s’arvolotu”. Cun is datzius americanus “est unu trumbugliu. Ant essi milionis e milionis de personis in totu su mundu a ndi pagai is conguentzias. Milionis de citadinus, torru a nai in totu s’orrestu de su mundu, ant a depiri fairi is contus cun s’ammanniamentu de su pretziu de dogna cosa. Is meiginas ant a costai de prus aici comenti a si spostai de una parti a s’atra. Est finas a nai ca at essi sa genti prus pobora a sunfriri prus de totus”.
Sighit sa matessi von der Leyen: “No est galu adduru, seus prontus a nai sa nosta e a si ponni in dd’una mesa totu paris po cicai un’acordiu. Finas nosu podeus nai sa nosta e abarrai segurus ca ddu eus a fairi chena farta”.
Màuru Mura
Giobia, su tres de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.open.online/2025/03/29/ursula-von-der-leyen-readiness-2030-italia-ucraina/
