Cussa posta in peis de Donald Trumpa est de averas una guerra de su cumerciu. Su presidenti de si Stadus Unidus eris at postu sa firma po ponni su datziu de su 25% contras de su Messicu e de su Canada e de su 10%, invecias, contras de sa Cina. Finas s’energia de su Canada at a depiri pagai una tassa de su 10%.
“Is mesuras de oi nos abbisongiant po ponni sa Cina, su Messicu e su Canada indenanti a is responsabilidadis insoru de no airi frimau su lompimentu de meiginas velenosas in is Stadus Unidus”, at scritu sa Domu Arva in X chistionendu de su Fentanyl, sa droga prus potenti de s’eroina chi at bociu milionis de personis in is Usa.
“Intru de sa campagna eletorali apu impromintiu a is americanus de ddus difendiri de is imigraus e de is drogas. Est doveri miu e m’ant votau in paricius, massimamenti po custu”, at, invacias, nau Donald Trump.
No addurant a lompiri is arrespustas. Su Canada, po si fairi cumprendiri beni, de cras at a ponni datzius po cussu chi lompit de is Stadus Unidus: “Eus a ponni datzius de su 25% ca ant essi in tou 155 miliardus de dollarus canadesus (Est a nai 102 miliardus de eurus)”, at nau su primu ministru Justin Trudeau.
Sa filera de unu at a boddiri is mercantzias Usa po lompiri finas a 30 milionis de dollarus canadesus giai cras. In segus in tres cidas s’ant a cuberai is atrus 125 miliardus: “Est doveri nosu de difendiri su Canada, is canadesus e is postus de trabbagliu de sa natzioni”, at sighiu sempiri Trudeau.
Matessi cosa at a sussediri cun su Messicu. Sa presidenti Claudia Sheinbaum at nau ca funt “machioris” is curpas chi Trump donat a su guvernu messicanu chi iat fueddau de acapius intru de su traficu de droga.
Pechino e sa Cina morrungiant po is mesuras americanas e fait sciri ca at a intendiri su Sotziu mondiali de su cumerciu e at a pigai mesuras ogualis.
Màuru Mura
Lunis, su tres de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://italian.cri.cn/2025/02/02/ARTI1738485144260968
