Totu serrau, cun su lutu, in dus Cumunus cras, dì de s’interru de Francisca Deidda, sa picioca de coranta dus annus bocia de su pobiddu, Igor Sollai, in su mesi de maju passau, a corpus de marteddu. S’interru de cras at essi a is dexi de mengianu in s’oratoriu a su costau de sa cresia de Santu Pitanu, in prassa Padre Pio in Su Masu, bidda de arreiginis de Francisca. Su logu est stetiu sceberau de sa familia chi bolit interrai in dignidadi, comenti minescit, sa picioca.

Is Cumunus de Su Masu e de Santu Sparau (aunia Francisca est stetia bocia in sa domu aunia biviat cun su pobiddu) ant declarau su lutu po donai “sa solidariedadi a sa familia e a is amigus e cumpartziri su dolu e s’indignatzioni chi custa morti at tentu in totu sa genti”.

Est cosa segura ca a s’interru si ddue ant agatai prus de unu sindigu de s’area metropolitana de Casteddu e is istitutzionis regionalis, poita “Totu paris si bolit torrai a nai ca cundennaus dogna violentzia contras de is feminas, una chistioni chi est sempiri oberta in biddas medas e po totu sa sociedadi sarda”.

“Sa memoria de Francisca – faint sciri de Su Masu e de Santu Sparau – depit essiri de avertimentu e un’arregioni po sighiri a trabaglia, paris, po fraigai una sociedadi prus giusta e segura po totus, ominis e feminas”.

Is bandelas ant essi amostadas a lutu in totu is edificius pubricus e is scolas. Cumerciantis, imprendidoris e trabagliadoris po contu insoru funt cumbidaus a frimai su trabbagliu intru de s’interru. Si cumbidant totus, galu, a fairi unu minutu a sa citia e de pregadoria a is dexi de mengianu, candu at a cumentzai sa missa”.

Po Igor Sollai, acapiau su tres de mesi de orgiolas su processu at a cumentzai su bintises de friargiu. Sa giustissia at a decidiri sa cundenna po Sollai e aici Francisca s’at a podiri pasai in pagi, comenti minescit.

 

 

Màuru Mura

 

 

 

Cenarba, su dexi de gennargiu de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.elmassardegna.it/it/articles/33/chiesa-di-san-sebastiano-di-elmas.html