Su centrumanca indenanti in totu is cuatru cumunus aunia si votaiat po fairi su sindigu nou e su consigliu comunali. Vitoria in sa filera de unu in Genova e Ravenna, in su mentris chi s’at andai a votai po sa borta de dus in Taranto e Matera, aunia, a dogna manera su matessi centrumanca est a innantis.
In Genova sa candidada sindiga de is progressistas, Sirvia Salis de craras arreiginis sardas, bincit cun su 51,7 de is votus contras de su candidau de su centrudrestra Perdu Piciocchi, chi lompit a su 44%. In palas is candidaus Antonedda Marras de Sinistra Alternativa e Mattia Crucioli de sa lista “Paris po sa Costitutzioni”.
Ravenna abarrat a su centrumanca, chena abbisongiu de andai a torrai a votai: Alissandru Barattoni bincit cun su 58% contras Nigola Grandi, de is Fradis de Italia e Fortza Italia, chi si frimat a su 25%. in su mentris chi is atrus dus candidaus, Arvaru Ancisi e Veronica Verlicchi, lompint a su 6,5% e su 4,2%.
In Matera est a innanti Robertu Cifarelli, sempiri de su centrumancu, a sighiri su centrudrestra cun Antoni Nicoletti e a suta de su 10% totu is atrus candidaus.
In Taranto sa drestra s’est presentada cumpartzia e po immoi est indenanti su candidau Perdu Bitetti, de su centrumanca. A sighiri Franciscu Tacente de is listas civicas agiudadas de sa Lega e, in segus, Luca Lazzaro, candidau de su centrudrestra. A serrai sa candidada de is Steddaus, est a nai Annagratzia Angolano.
“A pustis una torrada eletorali intru de sa genti, duas vitorias spantosas in Genova e Matera cun Sirvia Salis e Alissandru Barattoni, a is calis andant s’imbrassu nostu e is augurius de bonu trabagli – is fueddus de sa segretaria de su Partidu democratigu Elly Schlein –. Est finas a nai ca su partidu nostu si pesat de otu puntus cunforma a s’urtima torrada eletorali e immoi est su partidu prus sceberau de sa genti. Binceus finas in Assisi cun Valter Stoppini e funt bonus medas is contus de Taranto. Est una chistioni crara: su centrudrestra bincit in is sondagius, nosu binceus is eletzionis”.
Màuru Mura
Martis, su bintiseti de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.lastampa.it/politica/2025/05/26/news/silvia_salis_sindaca_genova_chi_e-15164223/
