Est mortu Karim Aga Khan, cussu chi nd’at pesau sa Costa Smeralda. Sa nova est de su merì adduru de eris. Iman de corantanoi de is musulmanus ismailitas nizaritas Aga Khan teniat otantot’annus. Est mortu in Lisbona, aunia s’agatat sa filera de svilipu cosa sua e una fundatzioni.
Est s’Aga Khan Development Network a fairi connosciri sa nova: “Su principi Karim Al-Hussaini Aga Khan IV – su paperi fatu girai – Iman ereditariu de corantanoi de is musulmanus sciitas ismailitas e discendenti de Maumetu est mortu in pagi in Lisbona su 4 de friargiu de su 2025, a s’idadi de 88 annus, ingiriau de s’amori de sa familia”.
Unu cuartu de ora a pustis est su Cunsortziu Costa Smeralda a scriri in is social: “Non agataus fueddus. Feti unu GRATZIAS”, in su mentris chi sa nova fait su giru de su mundu: su primu ministru de su Canada Justin Trudeau ndi chistionat comenti de “unu amigu mannu chi at a mancai meda a sa genti de totu su mundu”.
Intru de tempus pagu s’at a connosciri chini at a pigai su postu de su principi, in su mentris chi s’interru at essi in Lisbona etotu.
In su giassu de su Cunsortziu Costa Smeralda si ligint custus fueddus: “Su Principi Karim Aga Khan est su babbu mannu de unu bisu chi at mudau is contus sardus. Est issu a airi bofiu su Cunsortziu, a innantis pensau in su 1961 e dapoi postu in peis su 14 de martzu de su 1962 in Terranoa, in s’orruga de Umbertu a su numuru de domu 193 in denanti de su notaiu Mario Altea de Tempiu. Funt, prus o mancu, 1800 is etarus de terra a su cumentzu passaus de is meris becius a is nous. Totus s’agataiant de acordiu de ponni a curriri dinari meda po is galanias de sa Gaddura. Funt in ses cussus chi nd’ant pesau su Cunsortziu de sa Costa Smeralda: Karim Aga Khan, Patrick Guinnes, Felix Bigio, John Duncan Miller, Andrè Ardoin e René Podbielski”.
Màuru Mura
Mercuris, su cincu de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://it.wikipedia.org/wiki/Karim_Aga_Khan_IV
