Una cerimonia manna oi in Auschwitz po arregodai is otant’annus de sa liberatzioni de su campu nazista. Po s’Italia si ddue at agatai su presidenti de sa Republica Sergiu Mattarella, chi torrat in custu logu de dolu a pustis cuasi dus annus de s’urtima borta. Difatis in su mesi de arbili de su 2023 iat postu pei innoi po su “Caminu de is bius”, un’atobiu chi si fait in donnia cun migliaias de piciocus e piciocas intru de Auschwitz e Birkenau.
Spantosu est su numuru de genti chi at a lompiri de dogna parti de su mundu. Feti po ndi arrregodai calencunu, paris a su presidenti de sa Republica italiana ant a erribai su rei Carrulu III de Inghilterra, is realis de sa Danimarca, dei is Stadus Bascius, de Spagna e de sa Svetzia. E, ponendu a un’ala is familias realis, is presidentis comenti de Emmanuel Macron po sa Francia, Frank Walter Steinmeier po sa Germania, Alexander Van der Bellen po s’Austria. Non ant a mancai mancu primus ministrus comenti de Olaf Scholx po sa Germania e sa presidenti de su Parlamentu europeu Roberta Metsola.
Ocannu non s’ant a amostai is russus, est a nai cussus chi funt lompius po primus po donai sa libertadi a is presoneris chi s’agataiant in Auschwitz. Nemancu Benjamin Netanyau, su presidenti de Israele, at a lompiri e at essi su ministru de s’Educatzioni Yoav Kisch a presentziai po su stadu ebraicu.
Sa crobba chi donat Sergiu Mattarella a custa dì est de sempiri manna ca cicat de poderai s’arregodi e a ddu fairi connosciri a is piciocus prus giovunus: po s’agatai in Auschiwitz at spostau a cras sa cerimonia chi fait sempiri in su Quirinali po sa dì de s’arregodu.
Eris finas Paba Franciscu at arremonau ca “s’orrori mannu po sa morti de milionis de ebreus e atra genti de atra fidi religiosa e politiga non podit essiri scaresciu e nemancu negau. Tocat a s’agiudai unu cun s’atru po non scaresciri mai unu disacatu aici mannu”.
Màuru Mura
Lunis, su bintiseti de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.klm.it/travel-guide/inspiration/the-mechanized-horror-of-auschwitz
