Italia binta po 1-2 de sa Germania in sa partida de unu de is cuartus de finali de Nations League in su stadiu Giusepu Meazza de Milanu: a su gol de Tonali, a pustis noi minutus de giogu ant arrespustu, in sa parti de dus, Kleindienst e Goretzka.
Spalletti s’intregat, comenti de sempiri, a Barella, chi s’agatat in campu po sa bia de sessanta in Natzionali, e sceberat su 3-5-2: Donnarumma; Di Lorenzo, Bastoni, Calafiori; Politano, Barella, Rovella, Tonali, Udogie; Raspadori, Kean. Nagelsmann , s’allenadori de sa Germania, arrespundit cun su 4-2-3-1: Baumann; Kimmich, Tah, Rüdiger, Raum; Goretzka, Gross; Sané, Musiala, Amiri; Burkardt.
Sa partida cumentzat cun s’arregodu de Brunu Pizzul, su giornalista mortu sa cida passada, e su gol de s’Italia lompit a pustis de noi minutus: Bastoni donat sa bòcia a Barella, in s’atra parti de su campu, chi dda donat a Politano. Su giogadori de su Napoli non ci pensat duas bias e tirat in su centru de s’area de rigori, aunia s’agatat Tonali chi fait gol.
Sa Germania cicat de torrai a ponni in paridadi sa partida cun dus tirus de Goretza, ma is asulus italianus s’acostiant a fairi su gol de dus: a innantis cun dd’unu tiru de Tonali de foras de area e, a pustis, cun Kean chi de una parti de campu dificili ndi boddit su portieri tedescu.
A su cumentzu de sa parti de dus Kleindienst, imbucau a pustis su pasu, fait gol de conca. S’Italia si torrat a amostai indenanti cun Kean e, massimamenti, cun Raspadori, chi a sa sola faddit su gol tirendu a bellu in pissu de Baumann.
A su minutu de setantases su gol de Goretzka chi arregalat sa vitoria a is tedescus. A-i custu puntu ci torrat a provai s’Italia cun Barella e Maldini, ma sa partida acabbat aici.
Sa partida de torrada s’at a giogai in Dortmund dominigu chi lompit e s’Italia at a depiri binciri cun dus gol in prus de is tedescus. Cussa chi bincit at a giogai cun sa scuadra chi at a bessiri bincidora intru de Portogallo o Danimarca.
Màuru Mura
Cenarba, su bintunu de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.gazzetta.it/Calcio/Nazionale/20-03-2025/live-diretta-nations-league-italia-germania.shtml
