Su guvernadori republicanu de su Texas at nau ca coidendu s’at amostai sa “Guardia Natzionali in su Stadu po binciri is morrungius contras is politicas migratorias de s’aministratzioni ghiada de Trump. Sa sindiga de Los Angeles, Karen Bass, at declarau invecias ca in calencuna parti, de su centru de sa citadi, non s’at a podiri bessiri de is otu de merì americanas, finas a is ses de mengianu (est a nai candu in Italia ant essi is cincu de mengianu e is tres de a pustis prangiu).
“Apu declarau s’emergentzia de su logu, e postu su cumandu de non bessiri intru de su noti in sa citadi de dus prus manna de totu is Stadus Unidus, po cicai de frimai vandalismus e sdorrobamentus”, at nau sa sindiga de Los Angeles, in su mentris de un’atobiu aprontau cun is giorronalistas.
“Candu eus a essiri totus in pagi in Los Angeles, e feti tandu, sa ‘Guardia Natzionali’ si nd’at andai”. Ddu at nau su presidenti Donald Trump, chistionendu cun is giornalistas chi ddu sighiant. In cantu a is cumandus donaus a is sordaus po portai sa pagi, su presidenti at nau de no airi donau perunu indicu: “Est facili meda: chi is manifestantis ant a portai perigulus, chi scudint matonis, chi spudant in faci is sordaus, chi pigant a punnigosus sa genti e chi umperant armas, is sordaus ant a spundiri cun fortza manna e chini portat perigulu at a acabbai in presoni po tempus meda”, at spiegau Donald Trump.
Su Dipartimentu de Stadu americanu non tenit peruna gana de scoviai is nominis de is migrantis chena lei chi ce dd’ant acabbai in Guantanamo, a pustis chi su Washington Post at scritu ca intru de custus si iant podiri agatai finas italianus, francesus, tedescus e britannicus. “No est de certu una chistioni pigada in parri de su Dipartimentu de Stadu, no apa a nai sa natzionalidadi de chini immbucat in Guantanamo, finas poita de inigui dognunu at a torrai in sa natzioni sua”.
Màuru Mura
Mercuris, s’undixi de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.geopolitica.info/la-guardia-nazionale-americana-uno-sguardo-ad-una-forza-militare-unica-e-peculiare/
