At essi partida de importu mannu po su Casteddu cussa de dominigu in Empoli. Ma ancora de prus importu at essi po sa scuadra toscana, allenada de su cumentzu de campionau de D’Aversa. Difatis s’Empoli immoi s’agatat in su postu de tres po ci calai in Serie B e ddi serbit is tres puntus chi dd’iant podiri amostai una spera. Is piciocus de Davidi Nicola castiant de s’artu is piciocus de D’Aversa, ca s’agatant stesiaus de de ses puntus (su Casteddu est a bintinoi e s’Empoli a bintitres) e po custu iat essi de importu mannu a non perdiri sa partida. Finas feti unu puntu iat essi beni apretziau.

Est finas de nai ca sa Prefetura de sa citadi toscana, (poita?) no at a fairi lompiri is tifosus de su Casteddu chi bivint in Sardigna. Po custa chistioni at finas fueddau Nigola Riva, figliu connotu de Gigi, “Rombo di Tuono”, chi in su Casteddu tenit s’incarrigu de “Amostai is idealis de su Casteddu”. Su matessi Nicola, a pustis connota sa decisioni de sa Prefetura toscana at lamau is atrus tifosus, cussus chi bivint foras Sardigna amaroglia, ma si poderant sa scuadra de sa terra insoru in su coru: “A totu cussus sardus chi non bivint in s’Isula e tenint su Casteddu in su coru, bogliu nai de benni in Empoli ca teneus abbisongiu de bosatrus. Ant essi issus a agiudai sa scuadra, bistu ca chini bivit in Sardigna non ddu podit fairi. Ant essi issus a preniri su sbuidu de chini non ddu podit fairi. Est a nai ca no est giustu a non fairi lompiri is residentis in Sardigna”.

Su matessi Nigola Riva aciungit, dapoi, ca finas issu at essi a foras de su stadiu Castellani de Empoli. Comenti atrus sardus meda chi, po cussu chi amostant is social e non feti, si funt donendu s’ora po erribai in is parchegius de su stadiu po morrungiai, in pagi e chena perunu problema, po mori de custa decisioni in dd’una partida de importu po si sarvai de sa serie B.

 

 

 

 

 

Màuru Mura

 

 

 

Mercuris, su dus de arbili de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.calcio-sport.com/empoli-cagliari-esclusi-dalla-gara-i-tifosi-sardi-isola-indignata/