Su Casteddu est sarvu candu mancat galu una partida a s’acabbu de custu campionau de Serie A. Cussu chi siant postu in conca is giogadoris e s’allenadori Nicola, est lompiu, che ocannu passau, cun su 3-0 a su Venetzia chi at serrau is contus e fatu cumentzai sa festa a is tifosus de sa Domus Arena. “Torru gratzias a totus po su trabbagliu fatu”, narat Davidi Nicola. “A s’essiri sarvaus est de importu mannu po mimi etotu: in is urtimus annus, deu e sa truma de agiudantis, eus fatu cosas mannas, ma agataus sempiri un’arregioni po andai a innantis. Deu pensu ca su Casteddu no at mai castiau a is atrus campus, ma at fatu sempiri de conca sua”.
Sa seguresa de torrai a giogai in Serie A, po Nicola, est erribada “in s’ora giusta”. E comenti de ocannu passau candu a s’acabbu mancaiat una partida: “Soi allirgu meda de ce dd’airi fata. Est unu vantu airi fatu su matessi trabbagli de unu comenti de Ranieri. De candu nosi seus frimaus po sa Natzionali Italiana seus, intru de is scuadras chi gherraiant po non ci calai in Serie B, cussa chi at fatu prus puntus intur de sa parti de dus de su campionau, aici comenti in totu sa matessi parti de duas”.
Nicola, ca est unu omini sabiu, non tenit peruna perdigedda de si ndi tirai de is crapitas: “Bogliu cumpartziri s’allirghia cun totus. Deu bogliu sempiri migliorai, ma su Casteddu at fatu beni giai gioghendu in Sardigna aici comenti giohendu foras de sa Regioni. De seguru eus fatu faddinas, ma in su fubalu est normali: po mei non tocat a esagerai cun cussu chi si bolit, cunfroma a cussu chi si podit donai. Ci bolit prus tempus po lompiri a si sarvai candu de partidas ndi mancant tres”.
De su benienti, Nicola segat in curtzu: “Intantis teneus ancora una partida de giogai a su meglius”, est a nai cussa cun su Napoli de cenarba aunia s’at a decidiri su scudetu. “Innoi soi bofiu benni cun gana meda e soi erribau cun sa pensada de fraigai calencuna cosa de bonu. No est feti su paperi chi tenis chi ti fait diventai sa ghia, cantu invecias is risultaus. No est pagu a si sarvai po dus annus de sighiu cun dus allenadoris diversus. Immoi bieus chi est possibili a si sarvaia a innantis, chi nde chi no tocat a nai comenti funt is cosas. Deu soi cuntentu meda de preniri totu sa filera de su Casteddu: est spantosu”.
Màuru Mura
Lunis, su dixiannoi de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=PqhHygElVg8
