Fut partida de importu mannu cussa chi su Casteddu at giogau, eris a pusti prangiu, contras de su Parma. Difatis, a innantis de dda cumentzai, sa scuadra de Nicola fut stesiada de sa scuadra de Pecchia feti de unu puntu. Su Casteddu fut a bintunu puntus e su Parma unu scaleri a palas, a binti. Su Casteddu dd’at binta in sa parti de dus, dapoi chi sa parti de unu fut acabbada po 0-0. In dd’unu cuartu de ora, est a nai de su minutu de 57 a cussu de su 71, su Casteddu at fatu dus gol, a innantis cun dd’unu “autogol” de Vogliacco e insegus cun dd’unu grandu gol de sa compora noa, su rumenu Coman, chi cun dd’unu tiru spantosu at portau su Casteddu in pissu po 2-0. A nudda est bagliu su gol de su Parma, de Leoni, candu a s’acabbu de sa partida mancaiant ancora una deigina de minutus. Cun custus tres puntus su Casteddu giumpat s’Empoli de D’Aversa, Su Como de Fabregas e su Verona de Zanetti, s’acostiat a su Lecce de Giampaolo e si stesiat beni de su matessi Parma, de su Venetzia de Di Francesco e de su Monza.
Nicola, chistionendu cun is giornalistas, at nau: “Soi cuntentu meda po sa scuadra, po comenti trabbagliat, e poita eus pigau tres puntus de importu. No est una vitoria chi balit duas bortas, ma candu lompit cun dd’una scuadra chi fait su matessi caminu de seguru serbit de prus. Ma feti po tempus pagu ca immoi tocata a pensai a s’Atalanta. Chi castias sa classifica immoi tenis prus fortza in conca, ma bastat una partida perdia po torrai aunia fus. Custu at essi aici po totu s’orrestu de su campionau”.
Su contu prus galanu de su merì de eris est Florinel Coman, chi at fatu unu gol bellu de averas a sa bocia de tres chi at tocau. “Candu lompit unu giogadori chi tenit custa calidadi tocat a essiri allirgus. Su problema de Coman est ca at giogau s’urtima partida giai de un’arratu. Duncas tocat a ddu fairi giogai unu pagu de prus. Immoi, ca est giai prontu finas Luvumbo, teneus dus giogadoris po dogna parti de campu: a oi creu chi custa scadra tengiat un’identidadi crara!”.
Màuru Mura
Lunis, su dexi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=Pg-bC8OQCkI
