Su Casteddu si dda giogat, ma non bastat: est sa Juventus a binciri sa partida po 0-1 cun dd’unu gol a su cumentzu.
Difatis a su minutu de doxi lompit sa gol de sa scuadra de Motta cun Vlahovic chi cogliunat massimamenti Mina e su matessi portieri Caprile ponendu sa bòcia in sa janna casteddaia. Non balit sa cursa de Mina po cicai de non dda fairi imbucai.
Est prus sa Juventus a s’acostiai un’atra bia a fairi gol e difatis a su minutu de binticuatru Vlahovic ponit sa bòcia a intru de s’area casteddia, faccit Augello e aici Conceicao s’agata a sa sola, ma Caprile imboddiat beni su palu chi depit. Su portieri casteddaiu si sarvat finas tres minutus a pustis parendu su tiru de Yildiz. Dapoi est Koopmeiners a tirai a foras e ancora peus fait su matessi Conceicao a su minutu de trintacincu candu non ddi boddit su palloni.
Is scuadras andant a si pasai po unu cuartu de ora, non a innantis de unu tiru de Zortea parau facili de Di Gregorio. Sa parti de duas cumentzat cun Luvumbo, torrau a pustis prus de dus mesis, chi giogat a su postu de Felici. Inderetura su casteddaiu fait bogai unu cartellinu grogu po Weah chi non ce dda fait a ddu frimai. Dapoi de doixi minutus imbucat finas Coman. Ma non giuat ca is atzionis de su Casteddu sighint a essiri pagu cosa.
Su Casteddu non est arrennesciu a donai sighiu a is cuatru puntus in is urtimas duas partidas e Nicola narat: “Sa volontadi est cussa de tenni una manera de giogai comenti eus faut oi in sa parti de dus, ma a bortas po sa calidadi de is atras scuadras custu non si podit fairi. Immoi pensaus a sa partida benienti in Bologna, aunia serbit a torrai a partiri fendu puntus po nosi sarvai. No at essi facili, ca in custu campionau non si connoscit peruna partida facili, de seguru in campu eus a donai gana e barra. Sa spera est chi bastint”.
Màuru Mura
Lunis, su binticuatru de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=UYwWxPB9dgg
