Silicua, sa bidda posta in sa baddi de su Cixerri chi de su 13 de lampadas de su 2022, po sa borta de duas, est ghiada de sa sindiga Francisca Atzori. Silicua est posta a un’artaria de 66 metrus in pissu de su livellu de su mari e is 3523 residentis, sonumancu in s’urtima cica de su 29 de frairgiu de su 2024, si cumpartzint unu sartu comunali de cuasi 190 chilometrus cuadraus. Su matessi sartu lacanat cun Assemini (in s’isula amministrativa de Santu Lioni) Decimomannu, Decimu de Putzu, Iglesias (in s’isula amministrativa de Santu Marcu), Musei, Narcao, Nuxis, Uda, Vallermosa, Biddamassargia e Biddaspetziosa. Si poderat finas una fratzioni chi est Zinnigas e festat su santu amparadori, chi est Santu Jorghi, in donnia su 23 de arbili.
Su nomini cosa sua lompit de su latinu Siliqua chi bolit nai Baccello o Carruba e is primas arrastas de s’omini funt de su tempus a innantis de is nuragicus e de is nuragicus etotu, difatis in su sartu si ddue agatat prus de unu nuragi chi, a dogna manera, funt postus mali. In su tempus feniciu-punicu funt stetius fraigaus aposentamentus e fortificatzionis in sa zona lamada Medau Casteddu e in tempus de is romanus innoi passaiat s’acuedotu chi lompiat finas a Caralis, est a nai sa Casteddu de oi. In prus est stetia scorrovonada una necropoli.
In su Medioevu totu custu territoriu faiat parti de su Giudicau de Casteddu e preniat su paris in sa curadoria de Decimu. Innoi s’agataiat su casteddu de Acuafredda, fatu pesai de is marchesus Lacon-Massa, urtimus giuigis de Casteddu. A s’orruta de su Giudicau, in su 1258, su Casteddu e sa bidda funtiri passaus suta poderi de sa familia pisana de sa Gherardesca. A intru de su Casteddu de Acuafredda fut stetiu bòciu Vanni Gubeta, agiudanti de s’arcipiscamu Ruggieri de is Ubaldinus. De Gubetta ndi chistionaiat finas Dante Alighieri in su cantu de 33 de s’Inferru. Su casteddu est, dapoi, passau suta su cumandu de su cumunu de Pisa, e de su giuigi de Arborea alleau cosa sua, in su 1295. In su 1324, su matessi casteddu, iat resistiu a is atacus de is Aragonesus chi, a dogna manera, calencunu annu a pustis ddu pigaiant dapoi de sa concuista aragonesa de sa Sardigna. In su 1412 totu su territoriu est stetiu donau comenti de feudu de su rei de Aragona Ferdinandu de unu Su Giustu a Perdu Ogter. Dapoi Silicua est passada a su marechesau de Biddecidru e Palmas. In su 1839, cun s’acabbu de sa filera feudali, est stetiu riscatau a is Bon Crespi de Valdaura, is urtimus feudatarius po, aici, diventai unu cumunu aministrau de unu sindigu e de unu consigliu.
Màuru Mura
Martis, su seti de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.sardegnaturismo.it/it/esplora/siliqua
