Perdit su Casteddu cun s’Udinese e ddu fait mali. unu gol po tempus (in sa parti de unu de Lucca e isa parti de dus de Davies) at arregalau is tres puntus a is friulanus. Ma po chistionai de custa partida todcat a chistionai de candu s’arbitru Manganiello c’at stupau a Makoumbou po airi tentu sa curpa de dus cartellinus grogus in mesora de giogu, su primu a pustis cincu minutus. E Nicola ndi fueddat chena perunu pilu in sa limba: “Nosi seus imbuliaus sa partida: lastima, poita is piciocus ant donau totu cussu chi teniant”, est s’amargura de s’allenadori. “Depiaus essiri prus disciplinaus e capassus, finas a candu s’arbitru non c’at stupau a Makoumbou fustis cichendu de fairi sa partida nosta. Ma fait parti de su fubalu: podit sussediri a nosu e a is atrus. Tocat a imparai. Mi iat essi pragiu a biri sa partida in undixi contras de undixi”.
In pissu de Makoumou Nicola si frimat unu pagu de prus: “No est tontu, scit beni ca at faddiu poita fut giai amoniau. Tocat a pensai chi issu benit amoniu po duas bortas, ma in su fubalu is cartellinus sussedinti: fut unu tretu de partida aunia non faiat a mudai calencuna cosa. No at fatu cussu chi depiat fairi e po immoi non fut mai sussediu. Ma ddu eus a trabbagliai”.
Nicola, in segus chistionat de sa partida: “Sciaus de atobiai una scuadra forti in su cropus e chi scit giogai a fubalu, Lucca e Davis, massimamenti, nos ant impignau meda. Is piciocus funt abarraus in partida e a pustis eus cicau de erriscai calencuna cosa po provai a dda paregiai”. Ancora una bia su Casteddu at pigau gol cun dd’unu corpu de conca e de bocia frima: “No aput ancora bidu su gol, ma de seguru ci depiaus aspetai chi in sa bessida iant airi cicau de mudai parti de giogu. No eus pigau beni is positzionis, ma podit sussediri. Cun is bocias artas in s’area nosta e s’artaria de is giogadoris de s’Udinese custu perigulu si podit agatai”.
Màuru Mura
Cenarba, su bintises de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=VOMieoHJICY
