Una chistionada, in direta in su Telegiiornali, de giai cuatru minutus in su cali Mateu Salvini si dda pigat contras de sa magistradura, pnendu a sa paris sa chistioni de s’Albania e sa chistioni Open Arms.
Una chistionada lompia intru de sa, torrada a agatai, cuntierra de sa politiga e magistradura, cun su numuru dus de su Guvernu, chi ndi bolit fairi pesai sa Lega a sa mobilitatzioni contras is “giuigis politicizaus”. E, fueddendu de is doxi migrantis portaus de s’Albania a Bari, a pustis sa decisioni de su tribunali de Roma, narat: “Chi immoi calencunu de custus doxi si ponint a fairi is dellecuentis, chini ndi pagat is conseguentzias? Su matessi giuidi chi ddus at fatus torrai in Italia? Ia bolli sciri, poita intru de totu is trabbagliadoris chi paganta po is faddinas chi cumitint, is magistraus non pagant mai”.
De s’Albania a su processu Open Arms su caminu est pagu cosa, po Salvini: “Calencunu magistrau bolit bortulai su sceberu de sa genti in is torradas eletoralis e is lei de su Guvernu”.
Tostaus meda, in pissu de custa chistioni, is fueddus de sa segretaria de su Partidu Democratigu, Elly Schlein, chi fuddeat de “cumitziu de macus in su telegiornali” de “Salvini chi atacat is giuigis chi faint su doveri insoru po cussu chi narant is leis e sa Costitutzioni”. “Rai avilia chi benit umperada po donai bogi a unu guvernu chi bolit smontai su cumpartzimentu de is poderis atachendu sa magistradura – aciungit ancora sa Schlein –. No est possibili, non si ddu eus a permitiri”.
In su contu finas unu paperi de su comitau de redatzioni de sa Rai. “Pensaus ca is prus de cuatru minutus de intervista a su ministru Salvini, imputau in su processu Open Arms, amostada in su telegiornali de is otu de merì, apant ofendiu unu de is principius de prus importu de s’arti nostra: cussu de abarrai giustus in sa matessi manera intru de is partis. S’informatzioni de sa Rai depit essiri sempri oguali po totus”.
Màuru Mura
Lunis, su bintunu de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?app=desktop&v=llMDzII5f50
