Giuanni Luca Manganiello de sa setzioni Aia de Pinerolo est s’arbitru sceberau eris po Udinese-Casteddu, sa partida de unu de sa giornada de noi de su Campionau de Serie A chi s’at a giogai in su Stadiu Bluenergy, cenarba a is ses e mesu. A ddu agiudai in campu ant essi Luca Mondin (de sa setzioni de Treviso) cun Niccolò Pagliardini (de Aretzo) e arbitru foas de campu Marcu Monaldi de Macerata. In s’aposentu de su Var, invecias, si ddu ant agatai Mateu Gariglio, finas custu de Pinerolo comenti Manganiello, e Fideli Dionisi de s’Abila.
Su Casteddu est sa sa scuadra de dus cun prus partidas arbitradas de Manganiello, est a nai binti contras de is bintitres de su Spetzia. Aici, a dogna manera, est andada cun s’arbitru piemontesu: noi vitorias po is sardus, cincu paregius e ses partidas perdias. Sa borta de unu est sussedia su 31 de maju de su 2015 in dd’una vitoria, propriu contras de s’Udinese, po 4-3 e s’urtima partida de Manganiello po su Casteddu est de su 14 de gennargiu de ocannu candu is orrubius asulus ant bintu po 2-1 contras de su Bologna.
In su fratempus Davidi Nicola, a pustis is seti puntus in tres partidas (gratzias a is vitorias cun su Parma e Torinu intremesadas de su puntu pigau a sa Juventus) eris at ghiau su trabagliu de is giogadoris in su Crai Sport Center. Po donai sighidu a custus tres risultaus ancora no at a podiri fairi giogai Jakub Jankto, Lionardu Pavoletti e Adam Obert, totu is tres funt abarraus foras dominigu passau e eris puru no ant trabbagliau cun s’orrestu de sa truma.
Ocannu passau is friulanus e is sardus si funt cumpartzius ambas is partidas, cun dd’unu 0-0 in Casteddu e invecias un’1-1 in Friuli aunia a su gol de Zemura iat arrespustu Gaetano. Iat essi de importu mannu a ndi bessiri ocannu puru cun sonumancu unu puntu po donai sighiu a is urtimas tres partidas.
Màuru Mura
Giobia, su binticuatru de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.aiapinerolo.it/2017/05/16/manganiello-migliore-serieb/
