Su Casteddu addurat feti po sa parti de unu, a pustis chi pigat su gol non ce dda fait a giogai prus e ci stupat de sa Coppa Italia. A is cuartus de finali, aunia si dd’at a giogai cun s’Empoli, andat sa Juventus chi bincit sa partida po 4-0.
No est passau mancu unu minutu de su cumentzu chi su Casteddu iat a podiri fairi gol inderetura: Zortea si fuit in sa parti dereta de su campu, aunia si ddue agataiat McKennie comenti de tertzinu, ponit sa bocia in mesu aunia ddu est Lapadula chi tirat, ma Di Gregorio cun su pei non si spantat. Is piciocus de Nicola, in sa matessi atzioni, tirant po tres bias, a innantis cun Deiola e Prati e dapoi cun Marin chi ci scavulat s bocia a foras.
Sa Juventus s’amostat a su minutu de treixi candu Koopmeiners cicat su tiru e sa bocia andat a ce dd’acabbai de Vlahovic, ma sa bocia andat a acabbai a foras. Pagu a pustis de sa metadi de su primu tempus tirant bia sa porta de Scuffet, Savona cun Conceição, ma sempiri a foras. Scuffet a dogna manera fait una bella parada a su minutu de trintases, candu artziat su tiru de su matessi Conceição.
Candu pariat ca sa parti de unu ce dd’acabbessit in paregiu lompit su gol de sa Juventus: Vlahovic erricit sa bocia de Yildiz, si pigat giogu de Wieteska e ingrugiat su tiru fendu gol. In sa parti de dus lompit su 2-0 cun dd’una punitzioni de Koopmeiners de vinti metrus aunia Scuffet non ddu erribat.
Su Casteddu non ddu est prus e a pagu serbint is giogadoris nous chi njicola fait imbucai, est a nai totu paris Azzi, Pavoletti e Piccoli. Antzis est sa Juventus a s’acostiai a su 3-0 a innantis cun Vlahovic e in segus cun Nico Gonzales. Su gol de tres lompit a su minutu de otanta cun su portoghesu Conceição. Ma no acabbat aici, poita erribat finas su 4-0 cun Nico Gonzales. Lastima, ma immoi tocata scaresciri custa partida e un’atra borta conca a su campionau.
Màuru Mura
Mercuris, su dixiotu de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=Wx_XTlc5M2w
