Lamada de unu po cussa positzionis de classifica arta chi sa Torres at connotu po cuasi totu su campionau de ocannu passau, massimamenti in sa prima parti de su campionau chi dd’at portada a si giogai sa serie B in sparegius. Sa scuadra sassaresa oi, in su Vanni Sanna a is noi oras mancu unu cuartu, giogat cun su Milan Benienti cussa partida de sa giornadade tres chi fut stetia spostada. Chi sa Torres iat depiri binciri bessit, a su costau de sa Virtus Entella e de su Pescara, po castiai totu is atras scuadras de pissu. Sa scuadra de is giovunus de su Milan tenit giogadoris bonus meda, ma in su cumentzu de custa Serie C po s’ora at fatu feti unu puntu, gratzias a unu paregiu cun su Carpi cun su gol fatu de cussu Camarda, chi in su mundu de su fubalu italianu est giai connotu meda et est una spera manna finas po sa scuadra natzionali de Spalletti. Ma, no est ancora seguru chi su piciocu possat calai in campu cun cussa magligedda orrubia e niedda chi est famada meda. Intru de is milanistas s’agatat finas Longo, atacanti chi una dexina de annus a immoi iat giogau finas cun su Casteddu, ma dapoi at girau unu muntoni de scuadras in Italia e in logu strangiu.

In sa Torres calencunu giogadori no est postu beni po dolus, ma s’unica seguresa est ca no at a giogai su difensori Idda, difatis de unu bonu arratu de tempus est trabbagliendu a parti. S’allenadori Greco at a mudai sa scuadra finas poita sabudu at a torrai in campu, sempiri in Tatari po sa partida contras de su Pineto.

Po immoi sa Torres, in is tres partidas giogadas at fatu seti puntus. At cumentzau bincendu in domu cun sa Vis Pesaro po 3-0 (gol de Antonelli, Fischnaller e Masala) paregiau 2-2 (gol de Scotto e Masala) in domu de su Pescara de Baldini e dominigu passau est andada a binciri in Campobasso po 1-0 cun su gol de Scotto.

 

 

Màuru Mura

 

 

 

Mercuris, su dixiotu de cabidanni de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.calciomagazine.net/torres-milan-futuro-diretta-risultato-18-settembre-2024-209106.html