“No est unu scioberu aici tanti po fairi, ma arresurtau de una pensada politiga”. Cun custus fueddus su segretariu natzionali de Fortza Italia e finas ministru de is Esterus de su Guvernu Meloni, Antoni Tajani, annuntziat s’imbucamentu intru de sa filera de is deputaus regionalis de Giuanni Chessa, Pieru Maieli e Alfonso Marras: is tres consiglieris regionalis ant postu a un’ala su Partidu Sardu de Atzioni, cun su cali furint bessius in sa torrada eletorali de su 25 de friargiu passau, po mori de no andai de acordiu cun su segretariu Christian Solinas.
Cun su lassamentu de is tres consiglieris in s’assemblea regionali sarda immoi est sparessia sa truma de is sardistas, chi finas a immoi teniant un’acordiu cun sa Lega de Salvini.
“Ant decidiu de imbucai in sa domu manna de sa libertadi”, at sighiu a nai Tajani in s’atobiu cun is giornalistas “sa nostra est una domu chi donat seguresa a is citadinus, sa domu de is moderaus chi comenti naru sempiri s’at a ponni intru de sa parti de Giorgia Meloni e sa parti de Elly Schlein”.
Tajani at finas nau ca sabudu chi lompit in Sardigna c’at essi una manifestada in sa cali si ddu ant agatai finas is tres consiglieris.
Giuanni Chessa at nau: “Forsis non si ndi seus acataus, ma a intru de Fortza Italia in calencuna manera no si ddue seus sempiri agataus: custa est sa domu de is moderaus”.
De s’atra parti at chistionau finas su segretariu de su Psd’Az, Christian Solinas: “In custa chistioni non ddu at peruna pensada politiga, ma ddu ant fatu ca ddis cumbenit a insoru”. Fueddus tostaus meda cussus de su segretariu natzionali ca non c’at calau su sceberu de is tres consiglieris.
“Ma su partidu s’agatat ancora e bosi nd’eis acatai”, sighit a nai Solinas chi in segus atacat galu: “Non tocat a ponni in sa matessi pensada una storia centenaria de unu partidu cun genti chi comenti ant fatu atru in sa vida insoru, ant lassau su carru in s’ora in sa cali non ddu funt prus prendas e carrigas de donai”.
Màuru Mura
Martis, su dexi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://forzaitalia.it/i-nostri-valori/
