Su Casteddu ndi buscat cuatru in sa partida de eriseru a mericeddu cun su Napoli, ma a dda nai totu funt tropus cuatru gol de diferentzia ca su Casteddu non si dd’at giogada po nudda mali, antzis s’est acostiau meda a torrai a ponni una partida chi si fut posta mali de su cumentzu cun su gol, unu pagu de scofa est a nai, de Di Lorenzo a pustis digiotu minutus de giogu. Dapoi cun su gol de Kvaratskhelia e de Lukaku sa partida est acabbada. E su gol de cuatru de su Napoli cun Buongiorno est serbiu feti po is numurus.
E difatis s’allenadori Nicola chistionat de cussu chi est andau beni: “Chi unu castiat feti comenti est acabbada pensat chi su Casteddu no apat fatu nudda, invecias no est andada aici po nudda”, cumentzat a nai Davidi Nicola, allenadori pimontesu de su Casteddu. “Po sessantacincu minutus – aciungit – eus fatu una bella partida, su gol de Kvaratskhelia lompit a pustis de ocasionis medas chi eus tentu. In segus est seguru chi sa partida est mudada e totu est diventau prus dificili. Tandu depis sighiri a giogai ma poderendu finas un’ecuilibriu. De una parti soi cuntentu, poita sa scuadra est cumentzendu a amostai su trabbagliu chi feus intru de cida. Ma depeus cresciri in atentzioni e diventai prus pratigus. Non si depeus disisperai, tocat a si ndi torrai a pesai, ma est seguru chi sussedat”.
Chena un’atacanti chi facat gol medas, est custu su disisperu, c agiai ocannu passau su Cateddu fut postu mali ca perunu giogadori iat segnau prus de cincu gol. Immoi a pustis cuatru partidas s’est fatu feti unu gol, cussu de Piccoli contras de su Como. “Eus fatu unu sceberu in is comporas de s’istadi, est a nai de scumitiri in giogadoris chi ancora non tenint numurus mannus. Depeus tenni passientzia po ddus agiudai chena ddus ponni in is pumus artus candu funtzionant e chena ddus fairi disisperai candu non andant beni. Chi pigas cuatru gol in dd’una partida est seguru ca depis migliorai po fortza, perou chi unu bit totu sa partida, comenti in Lecce, est dificili a no airi fatu gol a pustist totu is ocasionis tentas. Su Casteddu at fat ucussu chi depiat fairi, custu est su caminu chi boleus portai a innantis. Non mi facu a una parti poita soi bientu cussu chi pedu”.
Màuru Mura
Lunis, su seixi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=MsqCos85DqM
