Una partida perdia chi “est grai meda. Chi oi iaus pigau puntus fustis ancora prus in giogu”. Davidi Ballardini non umperat mesus fueddus po contai sa partida perdia eris in Genova de su Sassuolo.

Nieddus birdis chi ant giogau sciendu giai de is partidas perdias de su Casteddu, de su Frosinone e de s’Empoli e duncas cun sa pensada de binciri po si torrai a ponni in cursa po si sarvai. Invecias, a pustis airi segnau cun Pinamonti in sa parti de unu, funt lompius is dus gol de su Genoa cun Badelj e cun Kumbulla chi c’at betau sa bocia in sa porta sua. Immoi su Sassuolo est postu mali de averas e su Casteddu, dominigu chi benit, ddi podit donai s’urtima spalada.

“Immoi po sa partida de dominigu cun su Casteddu si podit chistionai de partida de a intru o a foras, poita chi non binceus dominigu seus foras de dogna chistioni”, spiegat Ballardini, “Cussa de oi non fut partida de perdiri, forsis non minesciaus de binciri, ma a su matessi non minesciaus de dda perdiri”.

“Eus tentu situatzionis aunia podiaus essiri perigulosus meda, ma non seus stetius bravus in s’urtimu passagiu e non seus pigau peruna responsabilidadi. Arregodu calencuna bocia cun Volpato o cun Toljan chi no eus serrau. Non seus stetius aici bravus e malus comenti depis essiri in is urtimus dexi metrus de campu. Ma no arregodu mancu una parada de su portieri nostu. Oi su Sassuolo fut postu beni in campu e no at permitiu cuasi nudda a su Genoa, in dd’uu campu dificili meda. Po mei su Sassuolo at fatu una partida bona contras de una scuadra forti”.

Mancant feti duas partidas a s’acabbu de su campionau e su Sassuolo s’agatat a bintinoi puntus, ma feti a tres puntus de su postu po si sarvai e sa partida cun su Casteddu at essi sa prus de importu. “Finas a oi podiau nai ca fut de importu, ma non decisiva, invecias immoi sa partida cun su Casteddu, po cantu nosi pertocat, est decisiva”, serrat Ballardini.

 

 

 

Màuru Mura

 

 

 

Dominigu, su doxi de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.calciomercato.com/news/sassuolo-ballardini-oggi-meritavamo-di-piu-il-rosso-a-bijol-non–94803