Su fubalu prangit Comunardo Niccolai, giogadori beciu de is annus sessanta e setanta e finas allenadori chi at lassau unu sinnu chi non si podit scaresciri. Fut unu de is erois chi at portau su scudetu in Sardigna in su 1970 e a sa storia est passau, a dolumannu, po essiri su “Rei de is autogol”. Est mortu po mori de unu mali in su mentris chi s’agataiat in su spidali.
Comunardo si lamaiat aici, poita su babbu chi fut stetiu portieri de su Livorno, fut unu contras de is fascistas e su nomini fait riferimentu a sa “Comuni de Parigi”. A cantu si scit sa mama, ca fut democristiana e catolica, no at mai tzerriau su figliu cun custu nomini, ma ddu lamaiat Silvano.
Comenti eus nau in su mundu de su fubalu fut arregodau comenti de su “Rei de is autogol”, non po sa cantidadi de is matessis, ca nd’at fatu ses e duncas dus de mandu de Ricardu Ferri e Francu Baresi, ma po su spantu e sa bellesa. Comenti cussu de su 1970 contras de sa Juventus in dd’una partida chi baliat su scudetu.
Fut difensori tostau de sartai po is atacantis e in dd’una intervista iat nau: “Arregodu is autogo, unu in Catanzaro, unu in Perugia, unu in Roma e unu in Firenze, ma pariat ca ndi faia dexi a campionau. Po bona fortuna apu finas fatu cuatru gol in sa porta giusta. Mi iat fairi prageri de essiri arregodau po essiri presenti in Messico in su mondiali e po su scuedetu cun su Casteddu o finas po cussu chi apu fatu de allenadori. Ma est de importu a essiri arregodaus in calechisiat manera”.
De giogadori at bestiu, massimamenti, sa maglia de su Casteddu, difatis est abarrau in sa capitali sarda po doxi annus e est calau in campu po 222 bias. At giogau finas cun sa Torres, Chicago Mustangs, Perugia e Prato.
A pustis Riva, duncas su Casteddu de scudetu, ocannu, perdit un’atru omini balenti. Chi sa terra ddi siat lebia.
Màuru Mura
Martis, su dus de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.calciomercato.com/news/e-morto-comunardo-niccolai-campione-del-cagliari-dello-scudetto-re-degli-autogol-47322
