Sa timoria de sa pesta sighit a bessiri in Sardigna. Su bulletinu de eriseru fueddaiat de centubintotu positivus nous e cun is ispidalis sempiri prus prenus. Sighint a essiri sempiri de prus is biddas chi serrant po su Covid o chi ponint regulas comenti sa serrada de is scolas. Sa nova de eriseru erribat de Nugoro, aunia su sindigu Andria Sanna non serrat totu ma faidi una spetzia de mesu incungiamentu chi provat a sarvai is butegas obertas. S’ordinantzia de su Cumunu balit finas a su binti de custu mesi e proibit de intrai e de bessiri de Nugoro, e de andai a bisitai amigus o parentis sanus. S’at a podiri andai de una parti a s’atra feti po trabagliu, saludi o po abisongius strintus. Serradas finas totu is scolas mannas, ma abarrant obertas totu is atras, de s’infantzia a is medias.
In s’“Atene sarda” funt 251 is positivus e norantacuatru cussus chi s’agatant incungiaus in domu.
Cabuderra e Siurgus Donigala puru de eriseru funt in zona orrubia e s’incungiamentu sighit finas in Bono, Bultei e Samugheo, aunia is positivus funt erribaus a centusessanta.
Is scolas abarrant serradas in Bosa finas a su 14 de arbili e in Salighera finas a su 12 e in Macumere, cun totu is scolas serradas su matessi, su sindigu est pensendu de ponni sa citadina in incungiamentu.
Funt, a dolu mannu, imoi 16 is biddas serradas: Cabuderra (finas a su 17 de arbili), Siurgus Donigala (a su 20), Bono (a s’11), Bultei (a su 14), Samugheo (po imoi finas a s’11 ca si funt aspetendu is arresurtaus de atrus indagus), Gavoi (a su 13), Soleminis (a su 13), Burcei (a su 14), Santu Perdu (a su 12), Donori (a su 12), Pula (a su 16), Putumajore (a s’11), Sennariolo (a su 18), Sindia (a pusti cras) e Golfo Aranci (su matessi a pusti cras).
Medas de custas biddas funt sunfrendu de averas e totus non bint s’ora de torrai a partiri. Spereus coidendu!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: Archivio Domus de Janas
