Parteus de unu cunsideru, po nosu, seguru: su rigori po su Benevento ddue fut! Tocat a nai sa beridadi, ma de custu a nai, comenti at nau su presidenti de is campanus Vigorito, ca si bolit sarvai su Casteddu, o atras scuadras de su Nord, po nci fairi calai su Benevento nce ddi passat meda.

Partida, chi fut comenti unu a intru o a foras, cussa de eriseru a pusti prangiu: su Casteddu dd’at binta beni, finas cun d’unu pagu de fortuna, ca non guastat mai.

Candu perdis pighendu tres gol in domu tua tocat feti a si citiri, e is fueddus de genti comenti de Pippo Inzaghi, chi est de una vida in custu mundu, non tocat mancu a ddus ascurtai.

Cussu chi in is urtimas cincu partidas ant fatu is piciocus de Semplici est spantosu aberu: trexi puntus candu pariat totu contras. E propriu po custu non tocat a si frimai feti a d’episodiu chi at fatu aboginai, Vigorito, Foggia e s’allenadori Inzaghi, su Casteddu in campu at fatu biri ca est meda prus forti e si minescit a giogai su campionau de ocannu chi benit in Serie A.

Imoi ci funt atras tres partidas, duas in Casteddu (cun sa Fiorentina mercuris chi benit e cun su Genoa su 23 de maju) e una in Milano cun su Milan. A fairi contus e contigeddus est tempus perdiu, bastat a binciri una in pissu de tres e sa cosa est fata.

A custu puntu, est a nai, iat a parri ca su Casteddu est foras e s’urtimu postu po sa Serie B si ddu giogant su Torinu, su Spezia e su Benevento. Castiendu is partidas chi mancant at essi una de custas tres scuadras a fairi cumpangia a su Parma e a su Crotone.

“Conca a sa Fiorentina, at nau Semplici, ca ancora no eus fatu nudda” e sa sabiesa de cust’omini totu intreu tocat a ddu ascurtai, ca de candu est erribau in Casteddu no at sbagliau mancu unu fueddu e su trabagliu chi est fendu s’at arregodai po annus meda.

A dogna manera nosu ddu iaus nau de sempiri: no est unu meraculu, est gana e trabagliu.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.calciowebpuglia.it/benevento-1-3-cagliari-il-cagliari-sbanca-benevento/