“Mi diat piàghere a fotografare un’iscoberta chi jambet s’istória sarda”
Nudda fuit a s’obietivu de sa machina fotografica candu a dd’umperai ddu est calencunu chi tenit mirada longa e a Luisa Zoroddu de Oroteddi, coiada e mama de dus figlius, nàscia in su 1975, s’ogu non mancat de certu. Trabbagliat coment’’e fotografa in bidda sua paris a su pobiddu. Nàscia e pesada in mesu a rullinus e obietivus est arrennéscia a fairi diventai un hobby in-d-unu trabbagliu chi ddi ‘onat medas soddisfatzionis.
Comenti e candu nascit sa passioni po sa fotografia?
In domo apo semper connotu sas màchinas fotogràficas. At cumintzadu mannoi meu in su 1920, poi at sichidu babbu, mancari su triballu printzipale suo fit arbieri e rellozaiu. M’est semper aggradadu a compudare sa màchina sua, a ischire ite fin cussos nùmeros e a ite serbian. Ap’àpidu sa fortuna de poder mezorare fachende unu cursu in Nùgoro chin duos mastros: Ettore e Elisabetta Loi, babbu e fiza, chi triballan pro s’Unione Sarda e pro Videolina. Issos an, comente nàrrere, mezoradu su chi ja m’aiat imparadu babbu, ana ’idu sa passione mia e m’an sichidu passu-passu e galu oe, si poden, m’azuan semper.
Cali atretzadura imperas oi e cali eriseru?
Dae eris a oe b’at meda diferéntzia. Sa màchina de babbu fit una Reflex manuale analogica chin s’obietivu “a focale fissa”. Si ponian sas pellicolas 36mm, si deviat impostare su valore de s’oturadore e de su diaframa. Nois no aiamus su “esposimetro”, chi est un’istrumentu pro misurare custos valores, unu pacu si andaiat… a esperiéntzia. B’aiat pacu de irballare ca sos rullinos costaian e costaiat a los isvilupare. Oe bi sun sas machinas digitales, chi fachen totu issas e non b’at bisonzu de rullinos. Custu passazu est istadu unu bene e unu male paris. Unu bene ca a nois fotògrafos at permissu de coitare de prusu chin su triballu, pius pràticu. Babbu isvilupaiat sas fotografias in sa càmera oscura, chin sa lampadina ruja e sos àcidos. Cando, a sa prima, m’’idiat iscatande e poi chi iscaricaia deretu sa foto in su computer pro la ider dereta abbarraiat a buca abberta. Sa fotografia digitale m’at azuadu meda cando apo tribballadu comente fotocronista, iscataia sa foto chi serbiat e poi la daia dereta a su zornale.
Cal’est su segretu po fàiri fotografias bellas?
Su segretu est de àere meda passione e chircare de facher bìdere una cosa non comente la ’iden totus, ma comente la ’ido jeo e trasmìtere emotziones a chie a pustis bidet sas imàzines.
Esistint régulas po si migliorai?
Chin sa fotografia non si finit mai de imparare. Tocat semper de si mantenner agiornados chin cursos e zornales. Nos depimus semper cunfrontare cun àteros fotografos, tocat de èssere meda curiosos e pensare chi si podet semper facher mezus.
Ci funt fotografias chi ti pragint de prus?
De sicuru sun cussas chi mi trasmitin emotziones. Podet essere unu paesaggiu, unu ritratu. Sunu cussas chi cando las bido mi fachen benner sa tudda. M’aggradan meda cussas in “bianco-nero”, mancari anticas, ca poto ’idere cosas chi no apo mai idu.
Cali sogetus preferis?
Ti poto narrer custu: m’est capitadu de fotografare meda zente: isposos, pitzinneddos, féminas e ómines, ma sos antzianos an carchi cosa de prusu. Sos prichizones de sa cara, s’ocrada, sas manos, bastat de los abbaidare pro cumprèndere ite poden aer coladu in sa vida issoro.
Sardigna e fotografia: eita ti pragit de prus a fotografai de s’isula nosta?
Apo àpidu sa fortuna de fotografare meda de sa terra nostra: zente, costùmenes, arte sarda. Fachende un’ispecialitzazione in archeologia preistórica sarda, andat dae sè chi su chi m’agradat de pius sun sos monumentos preistóricos: domus de janas, nuraghes, tumbas de zigante. Mi firmo semper a pensare a comente podiat èssere sa zente in cussos tempos, ite fachian, comente an fatu a facher custas cosas monumentales.
Unu fotògrafu bit is cambiamentus in sa genti e in is logus: comenti est cambiendu sa Sardigna?
Sa Sardinna est cambiada, eja, e est galu cambiande. Si sun pérdidas medas cosas, medas tribballos chi no si fachen pius. B’at paca zente chi ischit fàchere sas córbulas de iscrarea, no si tribballat cuasi pius su furesi. Dae s’àteru chirru, tzertas traditziones chi sun abbarradas las connoschen in totue: sos tenores sun isbarcados in América, sas màscheras de carrasecare las connoschen peri sos giaponesos. Bido sa volontade de sos sardos de mantenner su connotu.
C’est unu fotògrafu, professionista o no, chi ti pragit prus de atrus?
B’at medas fotografos chi m’aggradan: Domìnigu Ruiu, Tore Ligios e àteros galu. Pius a distintu m’agradat su triballu chi fachet Elisabetta Loi, de Ilbono. La preferzo a medas àteros pro su corazu e sa fortza chi ponet in su chi fachet. Pro narrer, at fatu unu reportage in Afghanistan. Est istada inie, in mesu a sos sordados italianos e a sa zente afghana. Bidende sas fotografias suas, pariat de esser inie e de ’ider chin sos ocros mios sa realtade de cussos locos.
Eita t’iat a pràgiri a fotografai in su benidori?
No ap’àpidu ocasione de facher fotografias naturalìsticas. Mi diat aggradare a fotografare sos animales raros chi b’amus inoche: àbilas, mùvaras. Est una cosa chi galu mi mancat.
As fatu calencuna mostra?
Eja, non medas, ma calicuna l’apo fata. Sa chi m’at dadu pius soddisfatzione est istada cussa dedicada a s’iscritore Boboricu Cambosu, nàschidu in Oroteddi. Est istadu unu tribballu particolare ca amus picadu sos iscritos suos: dae Una stagione a Orolai amus bocadu carchi frase chi a pustis amus tramudadu in fotografia. In sa mostra cada fotografia fit acumpannada dae sa frase seperada. Est istada un’ocasione pro pònnere peri carchi fotografia fata dae mannoi.
Cal’est su bisu professionali chi tenis?
Diat esser bellu de ’idere un’iscoperta archeològica chi potat cambiare s’istória sarda e de èssere incue cando sutzedit. Iscoprire, pro esémpiu, chi sos sardos anticos aian s’iscritura. Documentare totu e narrer a nepodes mios: bi fipo jeo puru.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: Archivio Domus de Janas
