Sa scuadra de Di Francesco s’ingenugat in denanti de su Napoli de Gattuso e sa partida, giogada eriseru a is tres de merì, acabat  1-4. Zielinski fait gol po primu e, comenti a su solitu, Joao Pedro paregiat a pustis un’ora de giogu. Is sardus no ant mancu fatu in tempus a essiri cuntentus ca su Napoli, a pustis dus minutus, at torrau a segnai sempiri cun Zielinski. Ndi passant atrus tres de minutus e su Casteddu s’agatat a giogai in dexi contras de undixi: Lykogiannis nci benit stupau de s’arbitru Manganiello! Su Napoli non tenit piedadi de is piciocus de Di Francesco e a s’acabu de sa partida segnat atras duas bortas; una cun su messicanu Lozano e s’atra cun su capitanu Insigne. Imoi su Casteddu s’agatat a tres puntus de sa zona caglienti de sa classifica e po comenti fut partiu su campionau non parit beru.

Massiat feli s’allenadori de su Casteddu: “A giogai cun d’unu omini de mancu est sempiri dificili e su Napoli nd’at aprofitau. Podiaus fairi meda meglius, massimamenti in difesa, in su primu tempus. Candu eus torrau a incumentzai, in su segundu, fustis gioghendu beni, ma una borta chi su Napoli at torrau a segnai e, in seugus, s’arbitru c’at bogau a Lykogiannis, totu est diventau prus dificili. Depeus essiri prus scuadra e trabagliai sempiri de prus”.

Oi s’oberit su mercau po comporai giogadoris nous e po custu Di Francesco at nau: “De Pavoletti non sciu nudda, si ndi chistionat meda poita est unu atacanti. Est erribau Nainggolan e a nosu at a serbiri meda ca est unu giogadori espertu. Ma, donai atentzioni, no est cussu chi serbit po giogai a su postu de Rog. A dogna manera at a serbiri unu centrucampista”.

Is sardus tenint s’ocasioni de torrai a partiri giai sa dì de sa Befana, candu a sa Sardegna Arena, a mesudì e mesu, at erribai su Benevento de Pippo Inzaghi, chi po imoi est andendu beni de averas, foras de domu massimamenti. Tocat a donai crobba manna!

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

 

Foto: https://www.napolicalcionews.it/news-calcio-napoli/Il-tabellino–Cagliari-Napoli-1-4-105591.aspx