Unu puntu de oru cussu chi su Casteddu at pigau in Napoli. Candu sa partida pariat acabada unu gol de Nandez at permitiu a is piciocus de Semplici de ndi torrai in Sardigna cun d’unu puntu chi fait classifica, ca po sa prima borta de tempus meda s’agatant tres scuadras a palas, ma prus che a totu permitit dominigu chi benit de andai a Benevento cun sa possibilidadi de giogai po dus risultaus. Difatis su Benevento s’agatat a unu puntu e depit giogai po binciri e bastat in cussa chi, a is ogus de totus est unu sparegiu po non ci calai in Serie B. Po chini cumprendit de fubal e po cussus chi ddu sighint de una vida andat beni aici, poita si scit ca est unu vantagiu mannu de averas: is campanus depint feti atacai e su Casteddu podit giogai a su meglius. Chi su Casteddu ndi torrat cun tres puntus de Benevento podeus nai ca est sarvu ca is atras partidas funt prus facilis meda. Est a biri comenti acabat sa partida de custu merì, aunia su Torinu de Davidi Nicola giogat contras de su Parma: chi is emilianus faint una brulla manna a is torinesus, su Casteddu s’at agatai a palas cuatru scuadras. Totu est possibili, ma in is urtimas cuatru partidas su Casteddu at fatu totut cussu chi depiat fairi, chena lassai nudda a is atrus! No est unu meraculu, comenti calencunu tifosu narat, ma si lamat feti trabagliu, candu serbiant is puntus est benia a foras totu sa fortza de una scuadra chi non teniat nudda a ita biri cun is urtimus postus de sa classifica. At a serbiri, po scaddu, a chini preparat sa scuadra po ocannu chi benit: medas bortas serbit unu allenadori capassu e giogadoris chi non tengiat feti su nomini. Unu esempiu est Rugani, giogadori chi pariat chi essidi asseliau sa difesa e invecias s’est agatau a si setziri in panchina po fairi giogai cussu Andria Carboni chi est spantendu a totus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.youtube.com/watch?v=-hP0ecbfEd4
