Is esaminis de maturidadi e cussu de tertza media depint essiri fatus in presentzia. Ddu at nau dominigu passau in televisioni, de Fabio Fazio, su ministru de s’Istrutzioni Patritziu Bianchi. “Eus giai pediu, de imoi e totu, chi is piciocus e is consiglius de classi si pongiant de acordiu po un’argumentu po fairi unu trabagliu. No est, a parrer miu, una “tesina rafforzata”, po ddu fairi ci depint ponni coranta dis. In segus ant a chistionai de su trabagliu fatu cun s’esamini in presentzia. No est maturidadi a aspetai chi una busta bengiat oberta, aici, a ogus serraus, ma at essi una prova de maturidadi seria e tostada aunia s’at a biri chini est capassu de fairi beni”.
Su ministru at, da poi, chistionau de cumentzai a ponni in seguresa totu cussus chi trabaglian in su mundu de sa scola: “Deu creu chi siat de importu mannu chi totu is professoris facant su vacinu, depint essiri trancuillus. Non contant cali est su vacinu de fairi, a-i custu ci depint pensai atrus, non nosu”.
“Seus trabagliendu po una scola “chi bogliat beni”, aunia s’imparit a beru a bolli beni a is atrus – at sighiu a nai su ministru –. A pustis annus e annus de malu coru, tocat a torrai a una scola de amori e de socialidadi. Sa scola chi boleus nosu depit perimitiri a is piciocus de castiai e biviri su mundu”.
“No est beru chi sa scola est abarrada frima e nemancu chi est stetia serrada – at nau sempiri Bianchi arrespundendu a is preguntas de Fazio – is professoris ant fatu de totu po da tenni sempiri oberta. Sa Dad est, a pustis est cambiada: ocannu passau is professoris ant fatu biri s’idea insoru indenanti de su computer, imoi ant imparau comenti si depit essiri responsabilis a totus is piciocheddus e a is piciocus prus matucus. Forsis si podiat fairi de prus, ma seus andaus a innantis cun cussu chi teniaus”.
Po cabidanni chi benit su ministru tenit is ideas craras: “Eus a torrai a partiri de is piciocus chi tenint prus problemas, sa scola est po totus e at a torrai a partiri cun un’annu ‘costituente’. Sa scola depit essiri sa cosa prus de importu po su Stadu”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.today.it/politica/patrizio-bianchi.html
