“Teneus centudixianoi impestus dogna centumila abitantis, unu numuru chi est a suta de sa media de s’orrestu de s’Italia. Nos ant puniu candu invecias non seus prus in perigulu”. Aici s’assessori a sa Sanidadi de sa Regioni Màriu Nieddu at chistionau in Radio Capital in sa trasmissioni “Breakfast Club”. Nieddu amitit chi “candu seus intraus in zona arva eus donau prus pagu crobba, ma non possu intendiri calencunu omini politigu natzionali chi incurpat sa Sardigna e is politigus sardus de airi obertu chena arregulas”.

Non fait nominis e sangunaus s’assessori, ma si cumprendit beni de chini est chistionendu: su segretariu de su Partidu Democratigu Erricu Letta. “Est sempiri chistionendu de sa Sardigna chena sciri ita est sussediu – sighit Nieddu. Candu eus obertu eus pigua acordius cun s’Istituto superiore di Sanità. Est stranu meda chi cun is numurus chi teneus nos agateus in zona orrubia. Po dda nai totu, po mei, su sitema de is zonas funtzionat mali: seus orrubius cun numurus meglius de medas regionis chi funt in grogu. Candu eus tentu numurus prus artus, c’intrat finas a airi torrau a oberri, ma tocat a chistionai finas de sa varianti ingresa chi est erribada chena chi nosu dda connosciaus. Tocat a nai puru ca is impestus non ddu eus tentus in is bar e in is ristorantis, su problema mannu est sa genti chi s’agatat in is domus aglienas”.

Calant in su fratempus, is impestaus nous de Covid-19 in Sardigna: eriseru, in su bulletinu regionali, funt centutrintacincu e is mortus undixi. In is ispidalis s’agatant in 362 e in is aposentus de terapia intensiva, invecias, corantaseti.

In su territoriu aici funt dividius is 53.590 impestaus de candu est cumentzau totu de su mesi de martzu de ocannu passau: 13.977 in sa citadi metropolitana de Casteddu, 8.071 in su Sud Sardigna, 4.722 in sa provincia de Aristanis, 10.502 in cussa de Nugoro e 16.318 in cussa de Tatari.

 

 Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto:https://www.inail.it/cs/internet/comunicazione/covid19-misure-dell-istituto.html