De oi duas regionis e una provincia torrant in zona colori de arangiu: su Veneto, is Marche e sa provincia de Trento. Funt noi in totu is regionis orrrubias e undixi cussas arangiu.
A abarrai in orrubiu, po mori ca tenint dogna dì prus de 250 positivus in pissu de centumila personis cumpudadas funt sa Valle d’Aosta, Piemonti, Friuli Venezia Giulia, Puglia, Emilia Romagna, Lombardia, Toscana. Ci funt finas duas regionis chi abarrant in zona orrubia po duas cidas, poita su Rt est in pissu de s’1,25, e funt sa Calabria e sa Campania.
In colori de arangiu invecias funt sa Sicilia, sa Sardigna, Basilicata, Molise, Abruzzo, Lazio, Marche, Umbria, Veneto e is provincias de Trento e Bolzano.
Po sa scola de oi finas a s’acabu de su mesi de arbili totu is classis chi erribant finas a sa prima media ant a fairi letzioni in presentzia e si podit nai ca aici at essi finas a s’acabu de sa scola e totu. In is zonas de colori arangiu is scolas funt obertas finas po is piciocheddus de segunda e tertza media e feti is scolas mannas ant essi a su 50% a distantzia.
Sa Sardigna torrat, duncas, in arangiu e po imoi s’orrubiu est a un’ala e chi non crescint is positivus aici at abarrai. Si fueddat, a dogna manera, finas de calencunu mudamentu a partiri de su 20 de arbili. Giobia s’atobiant is presidentis de is regionis cun su presidenti de su Guvernu, Màariu Draghi, e is primus ant a pediri de torrai a oberri calencuna cosa chi is numurus funt meglius.
Is regulas po imoi abarrant sempiri is proprias: non si podit bessiri de is dexi de noti a is cincu de mengianu, bar e ristorantis ancora serraus e abarrant obertas totu is atras butegas, si podit bessiri in sa propria bidda e po chini bivit in biddas cun prus pagu de cincumila abitantis si podit andai finas a trinta chilometrus, chena podiri andai in is citadis mannas.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
