Po arregodai su chi ant fatu in vida e finas sa fini legia insoru. A setixentus annus de candu su paba Clemente V ndi ddus at fatus bogai de su mundu, s’A.R.S.O.M. bessit cun-d-una miscellànea de istùdius nous in pissu de is Templaris, a cura de su presidenti sû Massimo Rassu. “Fuant tres is ordinis militaris mannus de su medioevu: su Témpiu, s’ispidali de Santu Giuanni de Gerusalemme e s’Órdini Teutónicu. Ant tentu nascioni in Terra Santa po fai tres cosas: assisti pellegrinus e sordaus, difendi is cunfinis de is istadus cruxiaus e, mancai prus pagu, difundi s’evangéliu” narat Rassu. “Perunu atru órdini de cuadderis o de vida cunsagrada comente cussu de is Templaris at pesau in is séculus unu tanti de interessu. Istudiosus, istóricus, filosofus, teòlogus e ispertus de is traditzionis ocultas ant imbistigau s’argumentu”.

 

Sighendu s’àndala de is cuatru volùminis giai imprentaus, s’antologia noa – intitulada “L’insediamento dei Templari e degli ordini ospedalieri in Sardegna”, Arte e Valori, collana ‘I Quaderni’ – pigat s’argumentu de is Templaris de medas puntus de vista. “De parti insoru, in antis s’archeologu, a coa su giurista, a pusti su religiosu, pintant is caraterìsticas pretzisas, is regulas de cumportamentu, is impresas militaris e is lassidus monumentalis de custus mongius-gherreris, po ndi ddus arretirai de s’umbra chi ddus cuat de tropu tempus” narat Fabio Marcello, unu de is autoris de s’òpera.

 

Sa cica de is istudiosus nd’at fatu bessiri a pillu chi is propriedadis de is Templaris in Sardigna fuant cuncentradas totus in cudda chi Fabio Marcello at nomenau “area canonica” e chi dipendiant de un’unica mansio, chi cun meda probabilidadi fuat in Aristanis. Tra is atrus, un’istùdiu de Paola Cannella, chi amostat comenti sa crésia de Santa Maria de Uda, chi po medas tempus si pentzàt fabricada de is Templaris, dd’ant invecias fundada is Giuannitas a cumentzu de su Duxentus. Su traballu de Massimu Rassu andat a esaminai is fundatzionis templaris in terra de Sicilia e is liongius insoru cun cuddas gerosolimitanas.

 

Bella meda sa cica de Ermanno Pusceddu, chi in àutus processualis de su 1309 at agatau su nòmini de unu cuadderi templari de nascioni sarda, aristanesu cussu puru: Iohanne Aristan. Unu traballu pretzisu cussu de s’A.R.S.O.M., curau in dónnia parti, chi donat istrumentus bonus po sighiri s’àndala chi testimongiat su passagiu de is cuadderis de su Témpiu in s’Ìsula nosta.