Unu de sos prus importantes monumentos archeològicos de sa Sardigna e de su Mediterràneu contadu in limba sarda dae sos pitzinnos a àteros pitzinnos de sa matessi edade.

 

Sos pitzinnos contant su Nuraghe Santu Antine est su tìtulu de un’initziativa organizada dae s’Ufìtziu de sa limba sarda de Turalva e de Tiesi chi s’at a fàghere martis chi benit su 18 de nadale a sas 11 de mangianu in su cumplessu archeològicu de Santu Antine in su territòriu de sa comuna de Turalva.

 

Su progetu, in ue ant partetzipadu sa de chimbe classes de s’iscola primària de Turalva e sa prima classe de s’iscola mèdia de Bunnànnaru, est sa parte finale de unas cantas letziones in limba sarda in ue Juvanna Tuffu e Istèvene Ruju, responsàbiles de s’Ufìtziu de sa limba sarda de sas comunas de Turalva e de Tiesi, ant imparadu a sos alunnos s’istòria de su Nuraghe Santu Antine. Un’esperièntzia originale meda in ue sos pitzinnos, impreende sa limba sarda, ant a fàghere sas ghias turìsticas a sos cumpàngios de s’iscola primària e mèdia de Tiesi. Defèndere e impreare sa limba sarda a manera normale in totu sos cuntestos e a su matessi tempus valorizare su patrimòniu archeològicu de su territòriu nostru, sunt sos obietivos printzipales de custa initziativa.

 

Su progetu est istadu realizadu dae s’Ufìtziu de sa limba sarda de sas comunas de Turalva e de Tiesi e paris cun s’assòtziu culturale  Àndalanoa, s’Istitutu cumprensivu de Tiesi, sa cooperativa Sa Pintadera e sas comunas de Turalva, de Tiesi e de Bunnànnaru.