Sonos e cantos pro mè sun sa cura
chi de su coro alleviat sas penas.
E cantas garas, in nottes serenas,
m’han liberadu da-i sa tristura.
De sa musica sarda sa dulzura
mi paret chi l’intendat intro sas venas.
Forsi gai su cantu ’e sas sirenas
incantaian dogni criatura.
Sa musica est anti-depressiva,
s’isperimentu l’apo fattu in mè,
e bido chi sa cura est positiva.
Cando m’affliggit sa malinconia,
bastat ch’intenda una cantad’in ”re”
e luego mi torrat s’allegria.