Sa terra semenada est totacanta
de foghiles de gherra totu in tundu:
in su Giardinu Terrestre fecundu
sicadu an de sa paghe ogni pianta.
Sa bona volontade no est tanta
de ponner fine a s’odiu profundu,
ma ite isperat su restu ’e su mundu
si non b’at paghe mancu in Terrasanta?
Sa ’oghe americana pacifista
non podet mai cantare vitoria,
si sa musica faghet malu sonu.
Chie faghet torrare a sa memoria
s’eco de calchi ditatura trista
bisonzat chi de coro siat bonu.
Sa paghe si conchistat cun prudentzia
e non s’imponet cun sa prepotentzia.
