Sa cumpagnia, apo sempre intesu,
chi nachi fintzas Deus l’at amada,
e infatis Gesusu l’at chircada
tra apòstolos, vicinu e atesu.
Sa soledade est semper unu pesu
pro chie amat sa vida assotziada,
chie preferit sa vida isolada
o non cumprendet o no est cumpresu.
Sa cumpagnia est sempre unu consolu,
màssimu pro chie est in angustia,
o in turmentu pro calchi oriolu.
Si s’antzianu est sena cumpagnia
no est cumpletamente mai solu
ma cun Gesusu, Zuseppe e Maria.
