Est unu misteriu sa morti de Gene Hackman e de sa pobidda Betsy Arakawa. Candu eris a mericeddu ant agatau is corpus chena de vida s’atori e sa musicista funt giai mortus de tempus. Issu in dd’unu aposentu, de sa domu in Santa Fe, acostau de sa cogina, in su mentris chi sa pobidda dd’ant agatada in bagnu, fuliada in terra. Acanta de Betsy Arakawa una pariga de pastiglias.
Insoma unu misteriu chi minescit, de parti de sa politzia, calencunu indagu in prus. Cun s’atori de French Connection e Mississippi Burning ant agatau mortu, in dd’unu armadiu de su bagnu, unu de is tres canis de pobidda e pobiddu. Un’atru curriat in su giardinu e su de tres, invecias, fut bigliendu su corpu de Arakawa.
“S’autopsia nos at scoviai de prus”, at nau su scerifu Adan Mendoza a su New York Times. Roland Lowe Begay cun Jesse Kesler, is dus chi agiudaiant is mortus, chi non ddus biant de duas cidas, iant agatau sa janna de domu oberta.
Betsy, chi teniat sessantatres annus, “depiat essiri morta de tempus poita fut giai pagu frisca e cun is manus e is peis mumificaus”, si ligit in sa relata de sa politzia. Hackman, chi de annus ndi teniat norantacincu, ddu ant agatau in sa matessi manera, cun a su costau su baculu chi umperaiat po si moviri e una pariga de uglieras contras de su soli.
Po sa politzia non ddue fut perunu fragu de gas, comenti iat pensau Elizabeth Hackman, una de is tres figlius chi Gene iat tentu cun sa pobidda de unu, Fay Maltese. A dogna manera sa sociedadi de su gas castiat e agiudat s’indagu. Is corpus, est finas de nai, no amostant nudda chi facat pensai de ddus airi bocius, comenti no est agatau perunu billetu aunia si fueddit de suicidiu.
De doxi oras ant tentu abbisongiu po identificai is dus e a pustis funt cumentzaus a lompiri is fueddus de is atras steddas de Holliwood. Po Francis Ford Coppola, chi ddu iat dirigiu in “La conversazione”, Hackman fut “unu grandu atori, mannu de averas”.
Màuru Mura
Cenarba, su bintotu de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=6auF0R_kY6c
