Donald Trump si dda pigat un’atra borta contras de Zelensky, nendu a bogi arta ca su presidenti ucrainu paris cun su presidenti beciu de is Stadus Unidus Biden, funt is responsabilis de sa guerra in Ucraina, a sa cali Trump etotu bolit ponni su fueddu de s’acabbu. “Est sa guerra de Biden, non sa mia”, scrit su presidenti in Truth. “”Soi lompiu de pagu e, candu fui presidenti sa bia passada, po cuatr’annu no apu tentu perunu problema po non dda fairi pesai. Su presidenti Putin e totu is atrus ant portau rispetu po su presidenti de is Stadus Unidus! Deu non tengiu nudda a eita biri cun custa guerra, ma soi trabbagliendu cun atentzioni manna po dda frimai ca feti morti e distrutzioni podit portai”.
E galu narat: “Chi no iant cogliunau in sa torrada eletorali de su 2020, ca po chistionis meda ant cogliunau, cussa guerra non s’iat essi mai fata. Su presidenti Zelensky paris a Joe Biden ant permitiu, cun dd’unu trabbagliu legiu, chi su disacatu intru de Russia e Ucraina cumentzessit. Si podiant umperai maneras meda po lassai totu in pagi. Custu est cussu chi est sussediu in su tempus passau. Immoi, a dogna manera, depeus cicai de dda frimai e ddu depeus fairi coidendu, ca dogna dì si chistionat de mortus e de distrutzioni”.
In segus, su presidenti americanu at mudau sa chistioni, donendu sa curpa a totus e finas a Putin: “Custa est una guerra chi non depiat cumentzai mai. Biden – at nau – no est arrennesciu a ddu fairi e Zelensky ddu iat airi possiu fairi. Un’atru chi non depiat fustigai is gespis est Putin. Sa curpa est de totus”.
Su matessi Zelensky in dd’una ciaciarrada cun Cbs at nau ca s’aministratzioni de Trump est orruta in sa propaganda de is russus e ca su numuru dus de is Stadus Unidus Vance “est in calencuna manera ponendu sa parti a cussu chi at fatu Putin. Apu cicau de si ddu nai ca non totu podint tenni curpa. Est craru ca s’agatat sa Russia chi at atacau e nosu ca nosi seus difendedu. Ddu cumprendit chinechisiat!”.
Màuru Mura
Martis, su cunidixi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.virgilio.it/notizie/trump-contro-zelensky-e-biden-per-la-guerra-in-ucraina-le-accuse-e-il-riferimento-alle-colpe-di-putin-1673267
