Sa Serie A de ocannu passau est acabbada de nemancu duas cidas, ma est giai tempus de si castiai a-i cussa chi at a lompiri ocannu chi benit. S’at a cumentzai sabudu, su 23 de austu, cun is primas partidas de sa giorronada de unu, ma giai de cras s’ant a connosciri, intru e mesu de su Festival de sa Serie A in su Tiatru Regiu de Parma, totu is partidas de is trintotu giorronandas.
In su campionau chi eus a connosciri, eus agatai duas giorronadas chi s’ant giogai a intru de mesu cida – mercuris su 29 de mesi de talamini po sa giorronada de noi e marti 6 de genanrgiu de ocannu chi benit po sa giorronada de 19, chi at essi s’urtima de sa parti de unu – e cuatru frimadas po candu giogant is Natzionalis: dominigu seti de cabudanni, dominigu doxi de Santu Antine, dominigu su doxi de Sant’Andria e dominigu su bintinoi de martzu. S’urtima giorronada s’at a giogai su 24 de maju, in su mentris ca is su tempus de Paschigedda s’at a giogai dominigu su bintunu de mesi de Idas, sa giorronada de 16, dominigu su 28 de su matessi mesi, sa giorronada de 17 e sabudu su 3 de genanrgiu sa giorronada de 18. Po su Casteddu, sa partida de unu a innantis de su campionau at essi sa cida a innantis cun s’imbucu in sa Coppa Italia.
Comenti in donnia, est a nai de su 2021-2022, finas in sa Serie A benienti, sa parti de dus no at assimbigliai po nudda a is partidas de sa parti de unu, ma ant essi sonumancu otu is giorronadas chi ant a passai a innantis de torrai a agatai sa matessi scuadra.
Is derby, chi in custu campionau ant essi intru de Inter e Milan, Juventus e Torinu, Latziu e Roma, s’ant a giogai in giorronadas diversas e non a in sa giorronada de unu o in cussas intru de mesu cida. Is scuadras chi ant a giogai sa Champions Leaugue, est a nai Napoli, Inter, Atalanta, e Juventus, non ant a giogai cun cussas cualificadas po s’Europa Leaugue (Bologna e Roma) e in Confederence Leaugue (sa Fiorentina) in is giorronadas de cincu, de bintidus, de bintises, de bintinoi, de trintadus e de trintacincu, est a nai candu iant a podiri giogai in Europa.
Màuru Mura
Giobia, su cincu de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.sportpress24.com/2025/03/31/serie-a-2025-26-si-inizia-il-24-agosto-attenzione-al-mondiale-2026/
