“Piciocus chi si poderant sa maglia de su Casteddu comenti sa peddi. Un’allirghia chi est po scuadras pagas in su fubalu de oi”. Cun custus fueddus su presidenti de su Casteddu Tomasu Giulini at bofiu saludai a Lionardu Pavoletti e Alissandru Deiola, is dus capitanus e bandelas de su Casteddu chi, lunis a merì, ant fatu is dus gol chi funt serbius a sa scuadra de Nicola po binciri in Verona po 0-2.
A oberri sa cuntierra in favori de is orrubius asulus, a su minutu de trinta de sa parti de unu, est stetiu Pavoletti chi at arrespustu in custa manera a sa lamada de Davidi Nicola po pigai su postu de su scaulificau Robertu Piccoli. Deiola, invecias, a tempus pagu de s’acabbu, at fatu su gol de dus, a pustis chi Gaetano ddu iat feti cumbidau a ponni sa bocia a palas de Montipò, su portieri de su Verona.
Tres puntus chi a su Casteddu serbiant e si ddus at pigaus cun miniscimentu mannu. Difatis, gratzias a sa vitoria contras de sa scuadra de Zanetti, immoi su Casteddu est de averas a unu passu de s’obietivu chi teniat a su cumentzu de su campionau: est a nai a poderai sa categoria. Oi a su Casteddu iant a serbiri feti cincu puntus de fairi in cuatru partidas. Ma totu custu feti chi Empoli e Venetzia binciant totu is partidas de oi finas a s’acabbu de su campionau. Is cuatru partidas de su Csteddu ant essi aici cumpartzias: sabudu, su tres de maju, si cumentzat cun s’Udinese chi at a lompiri in Casteddu cun perunu obietivu; dapoi, sabudu su dexi de su matessi mesi, partida in Como contras de un’atra scuadra chi tenit de pediri pagu e chi est giai sarva; duncas at essi sa bia de su Venetzia a erribai in terra sarda e, probabilmenti, su poderamentu de sa sarvesa s’at a festai in Napoli in s’urtima partida. At essi festa po dus cun sa scuadra de Antoni Conte pronta a binciri su scudetu?
Màuru Mura
Mercuris, su trinta de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
