In su 2024, in Italia, eus tentu su numuru prus artu de trabbagliadoris a suta de is 18 annus: funt in 80.991 in s’idadi a intru de is 15 e is 17 annus. Unu numuru chi sighit a si ndi pesai e chi denunciat un’emergentzia, massimamenti sociali.
Est cantu ndi bessit a foras de s’urtima relata de s’Unicef po sa Dì mondiali contras de su sfrutamentu de su trabbagliu de is piciocheddus.
Intru de is regionis, sa Sardigna, est una de is terras aunia su numuru de is piciocheddus a suta de is 18 annus, est de is prus artas. In s’Isula sa percentuali chi trabbaglias est, difatis, de su 6,2% in su totu. E cun custu numuru sa Sardigna lompit a pustis de su Trentinu Alto Adige (21,63%), Baddi de Aosta (15,34%), Abrutzo (8,46%) e Marche (7,57%). Su matessi sumuru de sa Sardigan si ddu poderat finas sa Puglia.
Intru de custa emergentzia at finas pigau fueddu su Presidenti de sa Republica, Sergiu Mattarella: “Si scit ca prus de 160 milionis, de piciocheddus e piciocheddas, trabbagliant e totu custu ponit a erriscu sa saludi insoru. Ma est puru una chistioni de libbertadi”. Su Presidenti at aciuntu ca sa Costitutzioni italiana, in is articulus 31 e 34, “narat, cun craresa, de su doveri de sa Republica de protegiri is pipius e garantiri su diritu a s’istrutzioni”.
Po is numurus de s’Unicef, in is annus a pustis de sa pesta de su Covid-19, in Italia s’est pesau su numuru de is trabbagliadoris a suta is 18 annus, giai po contu de atrus e giai po contu insoru: 51.845 in su 2021; 69.601 in su 2022; 78.530 in su 2023. E ocannu, cun 80.991, su numuru prus artu mai connotu.
Su numuru si ndi pesat finas po is trabbagliadoris cun 19 annus de idadi: in su 2023 funt 415.495 (cumpartzius intru de 258 mila mascus e 157 mila feminas) cunfroma a is 377.440 de su 2022 e a is 310.400 de su 2021. Est unu contu chi fait pensai meda!
Màuru Mura
Giobia, su doxi de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.vaticannews.va/it/mondo/news/2021-07/sfruttamento-tratta-minori-italia.html
