Sa bulleta de sa lugi de seguru no est bamba po is sardus. Antzis, po is sardus, est salia meda. Su spaciamentu mediu po dogna familia est de 2.677kWh chi in dinari bolit nai 903 eurus s’annu, aici sa Sardigna s’agatat a essiri sa de unu de totu is regionis italianas.
Sa cica est de is studius de Facile.it, chi faint connosciri comenti su spaciamentu de sa currenti est lompia finas a su 14% in prus cunfroma a s’orrestu de s’Italia. Spaciamentu, est a nai, artu meda chi in parti si spiegat po mori ca in partis medas de s’Isula non s’agatat su “gas de citadi”, massimamenti po si caglientai e duncas s’umperant sa currenti.
A is palas de sa Sardigna agataus s’atra Isula, sa Sicilia, aunia ocannu passau dogna familia, sempiri in media, est lompia a spaciai 848 eurus chi est su spaciamentu de 2.445 kWh. Dapoi de sa Sardigna e sa Sicilia s’amostat su Venetu, cun dd’una bulleta de 833 eurus e spaciamentu de 2.386 kWh.
“Castiendu comeni andant is indicus podeus biri ca giai in sa parti de dus de ocannu passau su pretziu de is materias primarias funt torraus a si ndi pesai e su 2025 est cumentzau ancora peus – narant is espertus de Facile.it –. Po custa arregioni, oi prus che sempiri, chini s’agatat in su libberu mercau depit donai atentzioni manna in su sceberu de chini donat sa currenti”.
E propriu eris a mengiau in Palatzu Chigi si funt atobiaus sa presidenti de su Consigliu Giorgia Meloni cun is ministrus de s’Economia Giuanni Carrulu Giorgetti, su ministru de s’Ambienti Gilbertu Pichetto Fratin e cussu de is Afairis Europeus Tomasu Foti po fueddai de sa chistioni de is bulletas artas de sa lugi e po cicai de scriri unu decretu po sustenni is impresas e is familias chi s’agatant in dificultadi manna. S’opositizoni bolit coidai, ma sa chistioni abbisongiat ossumancu de una pariga de cidas.
Màuru Mura
Mercuris, su dixiannoi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.e-gazette.it/sezione/elettricita/bollette-elettriche-calo-198-nuovo-aggiornamento-non-vulnerabili
