In su servitziu, de s’atra dì, su giogadori de fubalu chi at giogau massimamenti cun Casteddu, Roma e Inter, at decidiu de chistionai cun Stevini Corti e Ricardu Messa intru de fubalu e s’acapiu po droga de su mesi de gennargiu passau.
“M’ant postu a intru po scimprorius”, narat in s’intervista Nainggolan, pesau in Linkeroever, cuartieri dificili de Anversa: “De piciocheddu – contat a is giornalistas – apu fatu tontesas meda: crovongiu e furas. Ma, de cussu caminu, ndi tenia abbisongiu ca non tenia nudda e cicaia de portai calencuna cosa a domu”. Dapoi su fubalu dd’at mudau sa vida: “Sa bonasorti mia est ca mi ndi soi andau a seixi annus, chi nde chi no non sciu comenti ce ddi airi acabbada”.
Corti ddi pregontat comenti furint is noti de candu giogaiat: “Su martis andaia a badda. Su mercuris giogaia cun sa playstation, su giobia bessia sempiri ca fut su merì ‘hip hop’, po mei su meglius ca mi ddue sciascaia. Difatis su cenarba fui postu mali candu mi depia allenai”.
Finas candu fut in ritiru cun sa scuadra non si pasaiat e difatis contat de candu giogaiat cun sa Roma e cun s’Inter: “A pustis de una partida giogada non beni soi andau a festai unu amigu chi faiat is annus, candu funt lompius tifosus de s’Inter e unu de issus m’at tirau unu ciafu a faci”, narat Nainggolan.
Sa chistionada cun su giogadori sighit finasa a su mesi de gennargiu de ocannu, candu ddu ant acapiau cun sa curpa de portai cocaina de s’America de basciu: “Deu soi contras de sa droga, finas chi de mimi ant fueddau comenti de Pablo Escobar”.
Infinis, Nainggolan acrarit sa relata cun Nasr-Eddine Sekkaki, fradi piticu de Ashraf, traficanti belga famau: “Mi scriu una pariga de bortas cun issu.., e sa politzia pensat chi funt messagius po fairi lompiri droga, in beridadi chistioniaus de dinari prestau intru de issu e mei, ma sa droga non c’intrat po nudda e nemancu is depidis de giogu. Est unu amigu miu, ma cussu chi fait in sa vida no est unu problema miu”.
Màuru Mura
Mercuris, su bintotu de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.iene.mediaset.it/video/corti-la-pazza-vita-del-calciatore-nainggolan_1400157.shtml
