Est oi sa dì de s’interru de Marianu Olla, su piciocheddu de seixi annus agatau mortu in abba, sabudu passau candu fut bessendu su soli, a metrus pagus de s’arena in is orus de aunia parchegiant is veturas, in su cuartieri de Sant’Elia in Casteddu.

Sa cerimonia at a cumentzai a is cuatru de a pustis prangiu in sa cresia de Santu Iorghi Martiri. Totu sa comunidadi de Sestu s’at atobiai po imbrassai su babbu, sa mama e sa sorrigedda de su giovunu, in su mentris chi s’indagu po sa morti s’ammanniat: immoi nd’est bessiu a pigliu ca calencunu, chena ddu bolliri, apat donau una manu po custu disacatu mannu.

S’atra dì s’autopsia in su corpus de su piciocu at scoviau s’arregioni po sa cali est mortu Marianu, est a nai ca s’est allupau. Difati su dotori Robertu Demontis at acrariu sa presentzia de s’abba in is prumonis de su mortu. In su mentris ca in s’orrestu de su corpus non s’agatat perunu signu de violentzia o de atras cosas chi possant nai atru.

At a tocai, immoi, aspetai po, prus o mancu, sessanta dis po connosciri is arresurtaus de is esaminis tossicologicus e istologicus, po cumprendiri chi su piciocheddu apat bufau alcolicus o umperau calencuna droga. Cussu chi est seguru est ca su giovunu fut lompiu in dd’una festa in sa cali si ddue agataiant paricius atrus piciocus, giai in pissu de is dixiotu annus e giai a suta de is matessis annus. Calencunu ddu iat airi bidu stesiendusindi e imbucai in abba, calencunu at finas cicau de ddu frimai, ma a s’acabbu s’est arrendiu e non si connoscit s’arregioni. Comenti non si connoscit s’arregioni po sa cali chini ddu at bidu e is atus chi funt in sa festa non si siant arriolaus candu ant bidu ca non torraiat.

A totu at a donai un’arrespusta s’indagu de is carabbineris, po immoi sa sola beridadi est ca unu piciocu de seixi annus est mortu e at lassau in su disisperu una familia.

 

 

 

 

Màuru Mura

 

 

 

Giobia, su dixiannoi de làmpadas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://tv6onair.com/tv6onair-mariano-olla-giovedi-i-funerali-a-sestu-le-indagini-si-fermano-cagliaripad-it/