Sa Sardigna est sa regioni italiana cun sa percentuali prus arta de discientis chi no ant a podiri donai s’esamini de maturidadi. Est de su 7,1% po sa Sardigna, in su mentris ca cussa natzionali s’abbasciat po lompiri a su 3,5%. Su numuru ndi bessit a pigliu po cussu chi benit scoviau de su Ministeru de s’Istrutzioni, a innantis de oi. Est de arregodai ca oi, su dixiotu de làmpadas, cumentzant, in totu is scolas superioris, is provas de italianu e cras, invecias, is discientis sardus e italianus ant a fairi sa prova de dus, chi at essi diferenti a segunda de s’indiritzu chi s’est sceberau.

In sa classifica de is scocorigaus s’Isula de sa Sardigna est sighia de sa Liguria, chi si frimat a su 5% e dapoi s’agatant su Trentinu Alto Adige cun su 4,6% de is bullaus. In segus a sa regioni de su Trentinu s’amostant paris atras duas regionis de s’Italia de mesu, est a nai sa Toscana cun s’Umbria chi, cun su matessi 4% s’agatant in sa positzioni de cuatru.

Est, invecias, su Molise sa regioni italiana aunia si scrocorigat prus pagu, difati sa terra molisana ndi contat feti po su 2,6%. Dapoi de su Molise agataus tres regionis paris a su 2,9%, est a nai sa Campania, sa Baddi de Aosta e su Veneto. A su 3,8% de is cracaus agataus sa Sicilia, in su mentris chi Latzio et Emilia si frimant a su 3,2% de is bullaus. Atras tres regionis, de pissu a basciu de s’italia, ddas agataus a su 3,6%: Piemonti, Puglia e Basilicata. Su Friuli est in is orus, comenti de percentuali: scrocorigaus po su 3,4%.

In Sardigna funt 12.378 is candidaus po sa maturidadi, unu numuru prus mannu cunfroma a-i cussu de su 2023-24, ca tandu funt in 12.220. In totu s’Italia invecias ant essi in 524.415 chi est unu pagheddu prus basciu de su numuru de ocannu passau candu funt in 526.317. Is discientis funt aici cumpartzius: in 268.577 studiant in is liceus, 169.682 in is tecnicus e 86.156 in is scolas professionalis.

 

 

 

 

Màuru Mura

 

 

 

Mercuris, su dixiotu de làmpadas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.scuolalink.it/maturita-2025-ecco-quando-scopriremo-le-materie-della-seconda-prova/#google_vignette