Nigolò Fagioli, su giogadori de mesucampu de sa Fiorentina chi est unu de is doxi giogadoris de sa Serie A postus suta indagu de is pm de Milanu in pissu de unu giru de scusmissas in giassus foras de lei, iat airi cumbidau is amigus a ponni dinari in dd’unu contu de Elysium, chi est una gioielleria, po si pagai is depidis.
Custu est cantu ndi bessit a pigliu de is paperis de s’indagu. De cantu si connoscit funt sonumancu binti is personis chi ant donau dirai a Fagioli chi, de contu su, iat airi impromintiu afairis mannus. Una manera de cuberai dinari chi, po chini est meri de s’indagu, s’amostat in dd’una chat de su mesi de austu de tres annus a immoi in sa cali pedit a Radu Matei Dragusin, giogadori de sa difesa de su Tottenham e giogadori beciu de sa Juventus (aunnia si funt connotus), chi a dogna manera no est intru de is incurapus. In is messagius si ligit: “Tengiu fidi in tui”.
E, dapoi, ddi narat de tenni sa possibilidadi de comporai in sa butega milanesa tres arrellogius e de ddus podiri bendiri a dexi mila eurus in prus, in dd’unu mesi “iant essi binti mila eurus a cadunu e ndi pigaus dexi in prus”. Fagioli, in prus de is depidis cun is “broker”, massimamenti cun Tomasu De Giacomo, unu de is cincu de sa filera tzerriada de sa giustissia “Elysium”, teniat depidis cun atra genti, comenti contant is chat agatdas. Est a nai cun Stevini Turati, portieri de su Monza chi iat airi umperau su nomini de sa mama, cun Caleb Okoli, difensori de su Leicester City, chi at postu a curriri corantaduamila eurus.
In is paperis de s’indagu, infinis, bessit a foras ca Fagioli denanti a is publicus ministerus de Torinu, aunia ant obertu s’indagu a innantis de ddu portai in Milanu, iat chistionau finas de su figliu de Andria Pirlo, intru de su cali at connotu genti chi scumitiat.
In dd’una chat intru de Fagioli cun Pietro Marinoni (arbitru suspendiu), in su mesi de lampadas de su 2023, si narat ca su figliu de Pirlo, chi no est suta indagu, fut “unu de nosu, ma su babbu ddu at cassau e dd’at serrau is contus finas a candu no at a tenni dixiot’annus”.
Màuru Mura
Mercuris, su seixi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://torino.corriere.it/notizie/cronaca/25_aprile_12/nicolo-fagioli-e-le-scommesse-lo-psicologo-che-ha-seguito-l-ex-juve-contestazioni-vecchie-cosi-ne-e-uscito-24389af5-bb09-4c5b-960b-b9ba385dbxlk.shtml
