Po is sardus sa pensioni media est de prus o mancu 1.240 eurus: est a nai sa prus bascia de totu s’orrestu de s’Italia. Custus funt is numurus, marigosus meda po sa Sardigna, chi bessit a pigliu de su XXIII Cica de s’Inps, presentau eris in Casteddu, in s’aposentu Lai de sa Facoltadi de Scentzias economicas, giuridicas e politigas de s’Universidadi casteddaiu.
Su trabbagliu, finas chi sighit sa chistioni de s’orrestu de s’Italia, est a nai trabbagliadoris in pesamentu e numuru de genti chena de trabbagliu prus pagu, a dogna manera non si ndi pesat beni meda po tres arregionis: sa genti sempiri prus becia, pagu genti chi nascit e is pensionis prus bascias de totu s’Italia.
Su dolu mannu, comenti fustis nendu, est cussu de is pensionis. In su 2023 funt stetias cumentzadas 20.495 pensionis noas, chi in totu funt, prus o mancu, 425 mila. Po cantu pertocat chi funt prus mascus o feminas is pensionaus est a nai ca is mascus funt de su 20% in prus.
De totu custus numurus nd’ant chistionau is espertus de s’Universidadi de Casteddu: “Scieus ca sa Sardigna sunfrit de una chistoni de imbeciamentu de sa popolatzioni de prus de s’orrestu de s’Italia e de is pipius pagus chi nascint – spiegat su professori Giuanni Sulis –. Totu custu fait nasciri su problema mannu de su mercau de su trabbagliu”. Su diretori de s’Inps Di Bernardo at torrau a nai ca s’istitutu chi ghiat “est trabbagliendu po arrespundiri meglius a is abbisongius de is trabbagliadoris e de is pensionaus. Cunfroma a su tempus pagu passau, in Sardigna seus diventaus prus fortis. Is contus nostrus funt meglius, massimamenti in is tempus: po pagai una pensioni immoi si depit aspetai feti unu mesi. Eus fatu unu caminu mannu ca in dus annus seus passaus de is urtimus postus a sa metadi de sa classifica”.
Intru de atra genti a s’atobiu s’agataiant finas is presidentis natzionalis e regionalis de s’Inps, est a nai Franciscu Di Bernardo cun Grabieli Fava.
Màuru Mura
Mercuris, su cuindixi de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.conflombardia.com/2023/03/09/italia/il-nuovo-portale-che-mette-lutente-al-centro-www-inps-it/redazione/
